Etincelles yatsinze AS Kigali iva ku mwanya wa nyuma

Etincelles yafashe umwanya wa 13 ku rutonde rwa shampiyona y'icyiciro cya mbere, nyuma yo gutsinda AS Kigali igitego 1-0 kuri uyu wa Kabiri, tariki 7 Mutarama 2025.

Igitego cya Niyonsenga Ibrahim ku munota wa 90 nicyo cyahesheje itsinzi Etincelles kuri Umuganda Stadium.

Iyi kipe, yo mu karere ka Rubavu, yagiye gukina uyu mukino w'ikirarane cy'umunsi wa 15 iri ku mwanya wa nyuma n'amanota 11.

Ni mu gihe AS Kigali yagiye gukina uyu mukino ibizi ko kubona itsinzi byayihesha umwanya wa kabiri ku rutonde rwa shampiyona.

Gusa abasore ba Mbarushimana Shabani, baherukaga gutsinda Gasogi United ibitego 2-1, bananirwa gukura APR ku mwanya wa kabiri, nyuma yo gutsindirwa i Rubavu.

Etincelles yasoje imikino ibanza iri ku mwanya wa 13 n'amanota 14 ndetse n'umwenda w'ibitego bine.

AS Kigali yagumye ku mwanya wa gatatu n'amanota 26 nyuma y'imikino 15 imaze gukina, aho irushwa amanota umunani na Rayon Sports, iyoboye urutonde rwa shampiyona, ikarushwa amanota abiri na APR ya kabiri.

Nyuma y'itsinzi ya Etincelles, Kiyovu Sports yahise ijya ku mwanya wa nyuma n'amanota 12.

Photo: Kapiteni wa AS Kigali, Akayezu Jean Bosco, afite umupira mu mukino ikipe ye yatsinzwemo igitego 1-0.