Erik ten Hag yirukanwe na Manchester United nyuma y'imyaka ibiri n'igice ari umutoza mukuru w'iyi kipe yo shampiyona y'icyiciro cya mbere mu Bwongereza.

Iki cyemezo ten Hag yakimenyeshejwe kuri uyu wa Mbere, nyuma yuko Manchester United itsindiwe i London na West Ham ibitego 2-1 ku Cyumweru.

Manchester United yari imaze igihe itabona umusaruro mwiza byumwihariko muri uyu mwaka w'imikino, dore ko yari imaze gutsinda imikino ine gusa muri 14 muri uyu mwaka w'imikino.

Uyu mutoza ukomoka mu Buholandi asize ikipe ku mwanya wa 14 ku rutonde rwa Premier League, aho ifite amanota 11 n'umwenda w'ibitego bitatu mu mikino icyenda.

Ruud van Nistelrooy, wari wungirije ten Hag, niwe ugiye gusigarana ikipe iri kwitegura umukino ifitanye na Leicester City tariki 30 Ukwakira 2024 muri 1/8 cya Carabao Cup.

Erik ten Hag yagizwe umutoza mukuru wa Manchester United muri Mata 2022. Mu gihe yari ayimazemo, yayihesheje ibikombe bibiri birimo Carabao Cup, yegukanye mu 2023, na FA Cup, yegukanye muri uyu mwaka.