Real Madrid izahura na Atlético Madrid muri 1/8 cya UEFA Champions League, mu gihe Paris Saint-Germain izahura na Liverpool.

Ibi byavuye muri tombola yabereye ku i Nyon mu Busuwisi ku gicamunsi cyo kuri uyu wa Gatanu, tariki 21 Gashyantare 2025, aho amakipe umunani, aherutse kubona itike ya 1/8 biciye muri mikino ya kamarampaka, yatomboranye n'andi yasoje imikino umunani ya mbere ari mu myanya umunani ya mbere.

Imwe mu mikino ikomeye yavuye muri iyi tombola irimo uzahuza amakipe abiri y'i Madrid, ndetse n'uzahuza PSG yo mu Bufaransa na Liverpool yo mu Bwongereza.

Real Madrid, yegukanye iri rushanwa riheruka ndetse ikaba imaze no kuryegukana inshuro nyinshi kurusha andi makipe, iheruka kunganya igitego 1-1 na Atlético ubwo aya makipe aheruka guhura muri La Liga.

Iyi kipe itozwa na Carlo Ancelotti ni yo izakira umukino ubanza tariki 4 Werurwe 2025, mu gihe Atlético izakira uwo kwishyura tariki 11 Werurwe 2025.

Izakomeza hagati ya Real Maddrid na Atlético Madrid izahura n'izava hagati ya PSV na Arsenal muri 1/4.

PSG, yatsinze ibitego byinshi (ibitego 10) mu mikino ibiri ya kamarampaka, ni yo izakira umukino ubanza wa 1/8 utegerejwe tariki 4 Werurwe 2025.

Luis Enrique n'abasore be bazaba bafite akazi gakomeye ko kwikura imbere ya Liverpool, yasoje imikino umunani ibanza iyoboye urutonde rwa UEFA Champions League n'amanota 21, aho yatsinzwe umukino umwe gusa.

Imikino ibanza ya 1/8 itegerejwe tariki 3 na 4 Werurwe 2025, mu gihe iyo kwishyura izaba tariki 10 na 11 Werurwe 2025.

Uko amakipe azahura muri 1/8 cya UEFA Champions League:

Real Madrid v Atlético Madrid

PSG v Liverpool

Club Brugge v Aston Villa

PSV Eindhoven v Arsenal

Benfica v Barcelona

Feyenoord v Inter Milan

Bayern Munich v Bayer Leverkusen

Dortmund v Lille