Hakizimana Muhadjiri, ukina hagati mu kibuga asatira, yatandukanye na Police FC, yari amaze imyaka ibiri n'igice akinira ku bwumvikane bw'impande zombi.

Uyu mukinnyi w'ikipe y'igihugu y'u Rwanda amaze igihe atabona umwanya na muto wo gukina kuva umwaka w'imikino wa 2025-26 watangira, ndetse byagaragaraga ko atari mu mibare y'umutoza Ben Moussa, umaze amezi atatu gusa muri Police FC.

Police iherutse no gutangaza Manishimwe Djabel, wari umaze igihe nta kipe afite nyuma yo kuva muri shampiyona ya Iraq, nk'umukinnyi mushya wayo.

Manishimwe yaje muri iyi kipe y'Igipolisi cy'u Rwanda nk'umusimbura wa Hakizimana.

Hakizimana yageze muri Police FC bwa mbere mu 2021, ariko nyuma y'umwaka umwe baratandukana, yerekeza muri Al-Kholood, yakinaga muri shampiyona y'icyiciro cya kabiri muri Saudi Arabia, muri Kamena 2022.

Yahamaze amezi atandatu gusa, ahita agaruka muri Police muri Mutarama 2023.

Muri iyo myaka yose yakiniye Police, yayifashije kwegukana ibikombe bitatu, birimo Igikombe cy'Amahoro mu 2024, Igikombe cy'Intwari mu 2024 nabwo, ndetse yanayifashije kwegukana irushanwa rihuza amakipe y'igipolisi yo mu karere k'uburasirazuba bw'Afurika mu 2023.

Biravugwa ko Hakizimana ari mu biganiro n'amakipe yo muri shampiyona y'u Rwanda kugira, dore ko ubu ari umukinnyi wigenga, aho bivugwa ko ashobora gusubira muri AS Kigali, yakiniye hagati ya 2020 na 2021.

Hakizimana ni umwe mu bakinnyi bakomoka mu Rwanda b'abanyempano bakinnye muri iyi shampiyona, gusa ikibazo cyo kudahozaho n'imyitwarire idashwitse mu kibuga no hanze yacyo byagiye bituma urwego rwe rusubira hasi.

Ibyo byanatumye uyu mukinnyi abura umwanya mu ikipe y'igihugu y'u Rwanda 'Amavubi' dore ko amaze imyaka irenga ibiri adahamagarwa.