UEFA Champions League: Arsenal yatsindiwe mu Butaliyani, PSG ishengurirwa iwayo

Inter Milan yatsinze Arsenal igitego 1-0 mu mukino w'umunsi wa kane wa UEFA Champions League wabaye mu ijoro ryo kuri uyu wa Gatatu kuri San Siro.

Igitego cya Hakan Çalhanoğlu kuri penaliti mu minota y'inyongera y'igice cya mbere nicyo cyahesheje Inter Milan itsinzi.

Arsenal yakije umuriro kuri Inter Milan mu gihe kinini cy'umukino, dore ko muri uyu mukino yaciye agahigo ko kuba ikipe ya mbere igeze mu rubuga rw'iyo bahanganye inshuro nyinshi muri Champions League y'uyu mwaka, aho yabikoze inshuro 543.

Inter Milan yahise yuzuza amanota 10, aho itaratsindwa umukino n'umwe muri UEFA Champions League yo muri uyu mwaka w'imikino. Iyi yari itsinzwi ya mbere Arsenal ibonye muri Champions League muri uyu mwaka w'imikino.

Mu yindi mikino yabaye mu ijoro ryakeye, PSG yatsindiwe ku kibuga cyayo na Atlético Madrid ibitego 2-1.

Byasabye iminota y'inyongera y'umukino kugira ngo Atlético Madrid ibone amanota atatu ku gitego cyatsinzwe na Angel Correa ku munota wa 93. Warren Zaïre-Emery wa PSG yari yafunguye amazamu ku munota wa 14 mbere y'uko Nahuel Molina yishyura iki gitego nyuma y'iminota ine.

Photo: Julian Alvarez wa Atlético Madrid ashaka gucenga kapiteni wa PSG, Marquinhos.

Ku rundi ruhande, Barcelona yanyagiye Crvena zvezda ibitego 5-2, aho Lewandowski yatsinze ibitego bibiri muri uyu mukino ahita yuzuza ibitego bitanu amaze gutsinda muri iri rushanwa muri uyu mwaka w'imikino, aho anganya na Raphinha nawe watsinze igitego. Ibindi bitego bikaba byatsinzwe na Fermin Lopez ndetse na Iñigo Martínez.

Aston Villa yo yatsindwaga umukino wa mbere Champions League y'uyu, dore ko yatsinzwe na Club Brugge igitego 1-0.

Nyuma y'imikino y'umunsi wa kane wa UEFA Champions League, Liverpool itaratsindwa niyo iyoboye urutonde n'amanota 12, mu gihe Slovan Bratislava ari iya nyuma, aho nta nota na rimwe irabona.

Photo: Ibyavuye mu mikino yose y'umunsi wa kane wa UEFA Champions League.