Kuri uyu wa Mbere, tariki 20 Mutarama 2025, Donald Trump yarahiriye kuba Perezida wa 47 wa Leta Zunze Ubumwe z’Amerika, nyuma yo gutsinda amatora y’Umukuru w’Igihugu mu Ugushyingo 2024.

Ni umuhango wabereye mu nyubako yitwa Capitol, aho witabiriwe n’abahoze bayobora iki gihugu, abaherwe bakomeye ku isi barimo Jeff Bezos, Mark Zuckerberg, Elon Musk, ndetse n’abandi banyacyubahiro batandukanye.

Trump w'imyaka 78 si ubwa mbere agiye kuba Perezida wa Leta Zunze Ubumwe z’Amerika, dore ko yayoboye iki gihugu hagati ya 2017 na 2021.

Ni mu gihe James David Vance yarahiriye kuba Visi Perezida wa Leta Zunze Ubumwe z’Amerika.

Bimwe mu byo yatangaje akimara kurahirira kongera kuyobora Leta Zunze Ubumwe z’Amerika, Trump yagaragaje ko agiye gukuraho uburenganzira bw’abihinduza igitsina.

Ati “Guhera ubu muri Leta Zunze Ubumwe z’Amerika hari ibitsina bibiri gusa, gabo na gore.”

Trump wo mu Ishyaka ry'Aba-Republican yavuze ko kandi agiye kongera guteza imbere Leta Zunze Ubumwe z’Amerika, ikongera kuba igihangange ndetse n’icyitegererezo ku isi.

Mbere yo kurahira, Trump yabanje kwakirwa na Joe Biden, yasimbuye muri White House, bombi bari kumwe n’abagore babo, Melania Trump na Jill Biden.

JD Vance nawe yarahiye

Photo: JD Vance yarahiriye kuba Visi Perezida wa Leta Zunze Ubumwe z’Amerika.