APR yegukanye umudali wa Bronze mu Gikombe cy'Afurika mu bagore

APR yegukanye umudali wa Bronze mu irushanwa ry'Igikombe cy'Afurika cy'amakipe y'abagore cya 2024 (Women's Basketball League Africa 2024) cyaberaga i Dakar muri Senegal.

Ibi iyi kipey'ingabo z'u Rwanda yabigezeho nyuma yo gutsinda ASC Ville de Dakar yo muri Senegal amanota 96-94 mu mukino wo guhatanira umwanya wa gatatu wabaye kuri iki Cyumweru, tariki 15 Ukuboza 2024.

Amakipe yombi yahanganye bikomeye guhera mu gace ka mbere kugeza umukino urangiye, dore ko uduce tubiri twa mbere twarangiye anganya amanota 37-37.

Iri hangana ryakomeje kugeza mu gace ka nyuma, karangiye amakipe yombi anganya amanota 82-82. Gusa mu minota y'inyongera, iyi kipe itozwa na Mushumba Charles yatsinze ASC Ville de Dakar amanota 14-12, bituma ibona itsinzi ku manota 96-94.

Italee Lucas yayoboye APR mu gutsinda aho yatsinze amanota 30, mu gihe Kierstan Bell yatsinze amanota 24, naho Shaina Pellington atsinda amanota 22.

Ndeye Maty Mbaye niwe watsindiye ASC Ville de Dakar amanota menshi muri uyu mukino, aho yatsinze amanoya 25.

APR yitabiriye iri rushanwa itumiwe nyuma yo gusoreza ku mwanya gatatu mu mikino yo gushaka itike y'Akarere ka Gatanu, yabereye Zanzibar, dore ko Al Ahly Sporting Club na REG ari zo zabonye itike muri aka karere.

Photo: APR yatsinze ASC Ville de Dakar amnota 94-92 mu mukino wo guhatanira umwanya wa gatatu.

REG, nayo yari ihagarariye u Rwanda, yasoreje ku mwanya wa gatandatu nyuma yo gutsindwa na Friend's Basketball Association yo muri Ivory Coast amanota 55-47.

Iri rushanwa ryegukanywe na Ferroviario de Maputo, yatsinze Al Ahly Sporting Club amanota 81-72 ku mukino wa nyuma.

Photo: REG yasoreje ku mwanya wa gatandatu mu irushanwa ry'Igikombe cy'Afurika cy'amakipe y'abagore cya 2024.

Photo: Umukino wahuje APR na ASC Ville de Dakar wari urimo ihangana rikomeye cyane.

Photo: Umutoza mukuru wa APR y'abagore, Mushumba Charles, yishimiye umwanya wa gatatu ikipe ye yabonye.