REG irakoza imitwe y'intoki ku gikombe, nyuma yo gutsinda APR mu mikino 3 ya mbere ya kamarampaka

REG irasabwa itsinzi imwe gusa kugira ngo yegukane igikombe cya shampiyona ya basketball mu bagore.

Ni nyuma yo gutsinda APR amanota 82-66 mu mukino wa gatatu wa kamarampaka wabereye kuri Petit Stade mu ijoro ryo ku wa Gatatu, tariki 9 Ukwakira 2024.

Uduce tubiri twa mbere twarangiye REG iyoboye n'amanota 41-37 muri uyu mukino. Iyi kipe, itozwa na Julian Martinez ukomoka muri Spain, yasoje agace ka gatatu yongereye ikinyuranyo, aho yari iri mbere n'amanota 10.

Mu gace ka nyuma, APR yasaga niyagarutse mu mukino mbere yuko Micomyiza Rosine wa REG atsinda amanota atatu inshuro ebyiri zikurikiranya, maze ibintu bihita biba bibi ku ruhande rwa APR, dore ko umukino wasojwe irushwa amanota 16.

Kristina King Morgan yongeye kwigaragaza, atsinda amanota 21, asama n'imipira 15 iva mu nkangara. Naho Destiney Philoxy Promise yatsinze amanota 19 atanga n'imipira 11 yavuyemo amanota.

Ni mu gihe, Uwizeye Assouma ari we watsinze amanota menshi mu ikipe ya APR, aho yatsinze amanota 13, naho Kamba Diakite atsinda amanota 12.

Umukino wa kane uteganyijwe kuri uyu wa Gatanu, tariki 11 Ukwakira 2024, kuri Petit Stade. Mu gihe APR yabona itsinzi, hazitabazwa umukino wa gatanu, naho REG ibonye itsinzi yahita yegukana igikombe cya shampiyona, iheruka mu 2022.