Basketball: REG yegukanye igikombe cya shampiyona mu bagore

REG y’abagore yegukanye igikombe cya shampiyona ya basketball mu Rwanda mu bagore, nyuma yo gutsinda APR amanota 71-63 mu mukino wa kane wa kamarampaka, wabereye kuri Petit Stade mu ijoro ryo kuri uyu wa Gatanu.

Iyi tsinzi yatumye REG igira itsinzi enye ku busa bwa APR mu mikino ya nyuma ya kamarampaka, maze itwara mukeba wayo APR igikombe idakozemo.

APR yari yabashije gusoza uduce tubiri twa mbere iri mbere ku kinyuranyo cy’amanota atatu, nyuma yo gutsinda amanota 18-15 mu gace ka mbere maze amakipe yombi akanganya 15-15 mu gace ka kabiri.

Mu gace ka gatatu, REG yigaranzuye APR muri uyu mukino igasoza iyoboye n’amanota 49-46.

APR, itozwa na Mushumba Charles, yagaragazaga ko ititeguye kurekura uyu mukino ngo itsindwe mu minota ya mbere y’agace ka nyuma, ariko mu minota ine ya nyuma yaje kuhatakariza imbaraga, itsindwa uyu mukino irushwa amabota umunani, inanirwa kwisubiza iki gikombe, yegukanye umwaka ushize itsinze REG.

REG, yaherukaga kwegukana shampiyona mu 2022, yahawe igikombe ndetse na miliyoni 10 z’amanyarwanda.

Bimwe mu bihembo byatanzwe, Kristina Morgan King wa REG yahembwe nk’umukinnyi witwaye neza (MVP) mu mikino ya kamarampaka anahabwa miliyoni ebyiri z’amanyarwanda. Naho, Nibishaka Brigitte wa GS Marie Reine Rwaza yegukanye igihembo cy’umukinnyi witwaye neza mu mikino isanzwe ya shampiyona.

Byukusenge Francois Xavier yabaye umutoza w’umwaka, nyuma yo guhesha GS Marie Reine Rwaza umwanya wa kane mu mikino ya kamarampaka.