APR BBC na Patriots BBC zatsinze imikino yazo ya kabiri muri ½ cya kamarampaka, bituma zongera amahirwe yazo yo kugera ku mukino wanyuma.

Nkuko byagenze mu mukino wa mbere, APR yatsinze REG BBC bigoye amanota 65-60. REG, itozwa n’umunya Nigeria Ogoh Odaudu, yayoboye uduce dutatu twa mbere tw’umukino, gusa iza gucika integer mu gace ka nyuma.

Antino Jackson, ukomoka muri Leta Zunze Ubumwe z’Amerika, niwe watsinze amanota menshi muri uyu mukino, aho yastinze amanota 21 agasama n’imipira irindwi yavaga mu nkangara, gusa ntibyari bihagije ngo biheshe REG itsinzi yari ikeneye cyane.

Ni mu gihe Isaiah Miller yayoboye APR mu gutsinda amanota menshi, nyuma yo gutsinda amanota 19 muri uyu mukino.

Kuri ubu APR iri imbere n’itsinzi 2-0.

Umukino wa gatatu uzaba kuri uyu wa Gatatu, tariki 4 Nzeri, muri BK Arena. APR nitsinda uyu mukino, izahita igera ku mukino wa nyuma wa kamarampaka, naho mu gihe REG yaba itsinze, hazitabazwa umukino wa kane.

Ni umukino wari uryoheye ijisho

Kurundi ruhande, Patriots yatsinze Kepler biyoroheye amanota 107-69, aho yabifashijwemo na William Perry watsinze amanota 22 muri uyu mukino, bituma iyi kipe itozwa n’umunya Tanzania Henry Mwinuka ijya imbere n’itsinzi 2-0.

Umukino wa gatatu w’aya makipe nawo uzaba kuri uyu wa Gatatu, tariki 4 Nzeri, muri BK Arena. Patriots izaba isabwa gutsinda kugirango igere ku mukino wa nyuma hatabanje kwitabazwa undi mukino.

William Perry yafashije Patriots gutsinda Kepler amanota 107-69

Muri iyi mikino ya ½, amakipe atanguranwa intsinzi eshatu, gusa imikino ishobora no kugera kuri itanu. Naho, ku mukino wa nyuma, amakipe atanguranwa intsinzi enye, ariko imikino ishobora kugera no kuri irindwi.

Muri iyi mikino ya playoffs kandi, ibihembo byarongerewe, aho umukinnyi witwaye neza (MVP) azajya ahembwa $2000 bivuye kuri $1500.

Ni mu gihe abakinnyi b’ikipe yatsinze bahabwa Rwf65,000 avuye kuri Rwf50,000 kuri buri mukinnyi, ndetse hongewemo n’abatoza batatu b’ikipe yatsinze.