Ndizeye Ndayisaba Dieudonné yerekeje muri Maghreb de Fes yo muri shampiyona ya basketball y'icyiciro cya mbere muri Morocco.

Uyu mukinnyi w'imyaka 28, wari umaze hafi imyaka 10 muri Patriots, yasinyiye Maghreb de Fes amasezerano y'igihe gito.

Ndizeye, umaze n'iminsi akorana imyitozo n'iyi kipe yo muri Morocco, yavuze ko yiteguye gufasha Maghreb de Fes gutsinda gutsinda, ati "Nishimiye kuba ndi hano."

Asinyiye Maghreb de Fes nyuma y'uko yerekeje muri REG, ariko bikazamo kidobya atarayikinira umukino n'umwe.

Mu Ukwakira 2024, Ndizeye yari yumvikanye na REG nk'umukinnyi wayo mushya cyo kimwe na mugenzi we bakinanaga muri Patriots, Steven Hagumintwari.

Gusa mu ntangiriro z'uyu mwaka aba bombi baje gutungura benshi bagaragara mu myitozo ya Patriots, nyuma y'uko habayeho ukutumvikana mu masezerano ku mpande zombi.

Byavugwaga ko REG yanze kubahiriza ibyo yari yumvikanye na Ndizeye ndetse na Hagumintwari birimo kugura amasezerano bari basanzwe bafitanye na Patriots.

Ndizeye yari aherutse gukinira Kriol Star yo muri Cape Verde mu mikino yo gushaka itike ya BAL yabaye mu mpera za 2024.

Uyu mukinnyi w'ikipe y'igihugu y'u Rwanda kandi ni we watsinze amanota atatu inshuro nyinshi mu mwaka w'imikino ushize muri shampiyona y'u Rwanda, aho yatsinze amanota atatu inshuro 65.

Ndizeye, wabaye umukinnyi mwiza wa shampiyona y'u Rwanda mu 2019, yari ari kumwe na REG muri BAL mu 2022 na 2023.