REG yakatishije itike y'igikombe cy'Afurika nyuma yo gutsinda APR

REG yatsinze APR amanota 82-77 kuri uyu wa Gatanu muri 1/2 cy'irushanwa ry'Akarere ka Gatanu mu gushaka itike y'Igikombe cy'Afurika mu makipe y'abagore 'Women's Basketball League Africa (WBLA) Zone 5 Qualifiers.'

Iyi kipe, iheruka kwegukana igikombe cya shampiyona y'u Rwanda, yahise ikatisha itike y'Igikombe cy'Afurika 'WBLA,' nyuma yo kugera ku mukino wa nyuma w'iyi mikino y'Akarere ka Gatanu iri kubera muri Zanzibar.

Victoria Reynolds yafashije cyane REG kubona itsinzi, aho yinjije amanota 26, asama imipira umunani iva mu nkangara, atanga n'imipira 10 yavuyemo amanota. Mu gihe, Kristina Morgan King yatsinze amanota 21, asama n'imipira 14 iva mu nkangara.

REG izahura na Al Ahly yo muri Misiri ku mukino wa nyuma w'imikino y'Akarere ka Gatanu. Al Ahly yo yageze ku mukino wa nyuma itsinze KPA yo muri Kenya amanota 104-63.

APR na REG nizo kipe zari zahagarariye u Rwanda mu mikino y'Akarere ka Gatanu, nyuma yuko zisoje mu myanya ibiri ya mbere muri shampiyona yasojwe mu Ukwakira 2024.

Amakipe abiri ya mbere muri iyi mikino y'Akarere ka Gatanu niyo abona itike y'igikombe cy'Afurika.

Photo: Victoria Reynolds yatsinze amanota 26 afasha REG kugera ku mukino wa nyuma w'irushanwa ry'Akarere ka Gatanu mu gushaka itike y'igikombe cy'Afurika.