Al Ahly yatsinze REG, yegukana irushanwa ry'Akarere ka Gatanu

Al Ahly yo mu Misiri yegukanye irushanwa ry'Akarere ka Gatanu mu gushaka itike y'Igikombe cy'Afurika, nyuma yo gutsinda REG amanota 93-68 ku mukino wa nyuma wabaye kuri uyu wa Gatandatu muri Zanzibar.

Aya makipe yombi yahanganye cyane mu duce dutatu twa mbere tw'umukino, twarangiye Al Ahly iyoboye n'amanota 64-60.

Gusa mu gace ka nyuma REG yarushijwe cyane, aho yinjije amanota umunani gusa kuri 29 yinjijwe na Al Ahly bituma umukino urangira irushwa amanota 25.

Nadine Mohamed Sayed yafashije cyane iyi kipe yo mu Misiri, aho yinjije amanota 23, mu gihe Raneem Elgedawy yatsinze amanota 20.

Destiney Promise Philoxy wa REG yatsinze amanota menshi muri uyu mukino, aho yinjije amanota 25, Kristina Morgan King atsinda amanota 21, naho Victoria Reynolds atsinda 18.

Nyuma y'umukino Morgan King yavuze ko bahaye Al Ahly amahirwe yo kubatsinda agace ka nyuma.

Ati "Twahanganye cyane ariko mu gace ka nyuma twatakaje umuvuko twari turiho, tuborohereza kudutsinda. Ni itsinzwi igoye kwakira ariko icyambere tugomba kwishimira ni uko twabonye itike y'igikombe cy'Afurika."

Ni inshuro ya kabiri yikurikiranya REG itsindirwa ku mukino wa nyuma w'iyi mikino y'Akarere ka Gatanu, dore ko umwaka ushize yatsinzwe na Kenya Ports Authority (KPA) amanota 87-53.

APR, nayo yari ihagarariye u Rwanda mu mikino y'Akarere ka Gatanu, yasoreje ku mwanya wa gatatu nyuma yo gutsinda KPA amanota 85-51.

Al Ahly na REG ni zo zizahagararira Akarere ka Gatanu mu gikombe cy'Afurika kizabera i Dakar muri Senegal.

Photo: REG yasoreje ku mwanya wa kabiri mu irushanwa ry'Akarere ka Gatanu ryo gushaka itike y'igikombe cy'Afurika.

Photo: APR yegukanye umudali wa Bronze, nyuma yo gutsinda KPA amanota 85-51 mu mukino wo guhatanira umwanya wa gatatu.