REG na APR zageze ku mukino wa nyuma wa kamarampaka mu bagore

Ikipe za REG na APR z’abagore zageze ku mukino wa nyuma wa kamarampaka muri shampiyona ya basketball nyuma yo gusezerera Kepler na GS Marie Reine Rwaza muri ½.

APR yageze ku mukino wa nyuma, nyuma yo gutsinda GS Marie Reine Rwaza amanota 86-45 mu mukino wa gatatu wabereye muri Petit Stade mu ijoro ryo ku wa Gatatu, tariki 2 Ukwakira, bituma igira itsinzi eshatu ku busa bwa GS Marie Reine.

Muri uyu mukino, Umugwaneza Charlotte yatsinzemo amanota 19, asama n’imipira 20 iva mu kangara, afasha APR kubona itsinzi biyoroheye.

Naho REG yujuje itsinzi eshatu ku busa bwa Kepler, nyuma yo kuyitsinda kuri uyu wa Gatatu mu mukino wa gatatu amanota 70-56. Iyi ikipe itozwa n’umunya Spain Julian Martinez yabifashijwemo na Victoria Reynolds watsinze amanota 20 akanatanga imipira itanu ivamo amanota.

Umukino wa mbere wa kamarampaka hagati ya APR na REG uzaba kuri uyu wa Gatanu, tariki 4 Ukwakira 2024, muri Petit Stade saa 20:30. Naho GS Marie Reine izahura na Kepler mu mukino wo guhatanira umwanya wa gatatu.

Uyu ni umwaka wa gatatu wikurikiranya APR na REG zihurira ku mukino wa nyuma wa kamarampaka wa shampiyona. Umwaka ushize, APR yegukanye igikombe n’itsinzi enye kuri imwe ya REG mu mukino wa nyuma wa kamarampaka.

Ni mu gihe, REG yari yegukanye igikombe igikombe cya shampiyona mu 2022, nyuma yo kwegukana itsinzi eshatu kuri imwe ya APR.