Niyonkuru Samuel na Irakoze Violette begukanye Umusambi Gravel Race 2024

Niyonkuru Samuel na Irakoze Neza Violette begukanye isiganwa ry’amagare ryiswe ‘Umusambi Gravel Race’ ryabaye kuri iki Cyumweru, tariki 1 Nzeri 2024, mu cyiciro cy'abagabo n'abagore babigize umwuga.

Iri siganwa, ryabaye ku nshuro ya kabiri, ritegurwa n’ishyirahamwe ry'umukino wo gusiganwa ku magare mu Rwanda (FERWACY) na Rwanda Wildlife Conservation Association mu rwego rwo kubungabunga imisambi.

Niyonkuru Samuel wa Team Amani yo muri Kenya, yegukanye iri siganwa mu bagabo babigize umwuga akoresheje amasaha atatu, iminota itandatu n’amasegonda 25.

Uyu musore ni nawe wari wegukanye iri rushanwa ubwo ryakinwaga bwa mbere umwaka ushize. Yakurikiwe na Nshutiraguma Kevin ukinira Cine Elmay yarushije iminota 18 n’amasegonda atanu.

Umusambi Gravel Race 2024 yakinwe mu byiciro bitatu birimo ababigize umwuga, mu babao n’abagore bakoze intera y’ibilometero 89.1, abatarabigize umwuga, bo bakoze intera y’ibilometero 46, ndetse n’abakoresha amagare asanzwe ya matabaro (Pneu Ballon) bakoze intera y’ibilometero 37.

Iri siganwa, ribera mu turere twa Gicumbi na Burera, ryanyuze mu mihanda izengurutse igishanga cya Rugezi kiri muri utwo turere kigaragaramo urusobe rw'ibinyabuzima byiganjemo imisambi n'izindi nyoni z'ubwoko bwinshi.