Ishyirahamwe ry'Umupira w'Amaguru mu Rwanda (FERWAFA) ryatangaje ko Adel Amrouche yagizwe umutoza mukuru w'ikipe y'igihugu y'u Rwanda 'Amavubi.'

Uyu mutoza, ukomoka muri Algeria, yasimbuye Frank Torsten Spittler, watandukanye n'Amavubi mu mpera za 2024 nyuma y'umwaka umwe atoza iyi kipe y'igihugu.

Amrouche, wasinye amasezerano y'imyaka ibiri, azungirizwa na Nshimiyimana Eric ndetse na Dr Carolin Braun, ukomoka mu Budage.

Amavubi yari amaze amezi arenga abiri adafite umutoza mukuru, nyuma y'uko Torsten Spittler asoje amasezerano ye y'umwaka umwe, ntiyongerwe andi.

Ni mu gihe iyi kipe y'igihugu yitegura imikino ibiri yo gushaka itike y'Igikombe cy'Isi azakina na Nigeria ndetse na Lesotho tariki 21 na 25 Werurwe 2025 i Kigali.

Amrouche w'imyaka 56 si mushya muri ruhago yo muri Afurika, byumwihariko ku ruhando rw'amakipe y'ibihugu, dore ko yatoje arimo Equatorial Guinea, u Burundi, Kenya, Kenya, Libya, na Botswana.

Yaherukaga mu ikipe y'igihugu ya Tanzania, batandukanye muri Mutarama 2024.

Nshimiyimana Eric nawe si mushya mu Amavubi, dore ko yayabayemo mu bihe bitandukanye, hagati ya 2009 na 2010, agarukamo mu 2013.

FERWAFA kandi yatangaje ko Cassa Mbungo André yagizwe umutoza mukuru w'ikipe y'igihugu y'u Rwanda y'abagore, nyuma yo kuyitoza nk'ikiraka mu mikino ibiri yo gushaka itike y'Igikombe cy'Afurika, yarangiye u Rwanda rusezerewe na Misiri ku giteranyo cy'ibitego 3-2.

Eric Nshimiyimana

Photo: Eric Nshimiyimana yagarutse mu Amavubi, aho azungiriza Adel Amrouche.

Cassa Mbugo

Photo: Cassa Mbungo André yagizwe umutoza mukuru w'ikipe y'igihugu y'u Rwanda y'abagore.