Amagaju yanganyije na Rayon Sports igitego 1-1 mu mukino w'umunsi wa 18 wa shampiyona y'icyiciro cya mbere wabereye kuri Sitade Huye ku mugoroba wo kuri uyu wa Gatandatu, tariki 22 Gashyantare 2025.

Rayon Sports yabanje igitego mu gice cya mbere, gusa inanirwa kukirinda cyangwa ngo yongere ikinyuranyo maze Amagaju arayishyura, atuma itakaza amanota abiri.

Iyi kipe itozwa na Robertinho yaburaga bamwe mu bakinnyi bayifashije cyane muri uyu mwaka w'imikino barimo kapiteni wayo, Muhire Kevin, ufite ikibazo cy'imvune, Omborenga Fitina na Adama Bagayogo, bahanwe kubera amakarita menshi y'umuhondo.

Fall Ngagne yafunguye amazamu ku munota wa 31 ku ishoti yatereye hafi y'izamu, nyuma y'umupira muremure yari ahawe na Rukundo Abdul Rahman ariko ukorwaho na myugariro wa Amagaju, Addel Wakonda.

Uyu rutahizamu, ukomoka muri Senegal, yahise yuzuza ibitego 13 amaze gutsinda muri shampiyona y'uyu mwaka w'imikino, ndetse ni we uyoboye abamaze gutsinda byinshi.

Byasabye Niyongabo Amars n'abasore be umunota wa 79, kugira ngo bishyure igitego bari batsinzwe mu mukino bakiriye, ku gitego cyatsinzwe na rutahizamu Useni Seraphin, nyuma yo guhabwa umupira na kapiteni we Masudi Narcisse, bituma amakipe yombi agabana amanota.

Muri uyu mwaka w'imikino, Amagaju akuye amanota menshi ku makipe ayoboye shampiyona, Rayon Sports na APR, dore ko mu mikino ibanza yatsinze ikipe y'Ingabo z'u Rwanda igitego 1-0, mu gihe yakuye amanota abiri kuri Rayon mu mikino ibiri, aho umukino ubanza banganyije ibitego 2-2.

Kunganya kwa Rayon Sports byayishyize ku gitutu gikomeye mu rugendo rwo guhatanira igikombe cya shampiyona y'uyu mwaka, dore ko kuri ubu irusha APR amanota ane, ariko mu gihe iyi kipe y'Ingabo z'u Rwanda yatsinda Mukura kuri iki Cyumweru, hasigaramo ikinyuranyo cy'inota rimwe.

Rayon Sports iyoboye urutonde rwa shampiyona n'amanota 41 mu mikino 18 imaze gukina, aho yanganyijemo itanu, itsindwa umwe, itsinda 12.

Iyi kipe, yambara ubururu n'umweru, kandi iri mu ihurizo ryo gutakaza umukinnyi wayo ngenderwaho, Fall Ngagne, wasohotse mu kibuga umukino utarangiye kubera ikibazo cy'imvune. Icyakora ntiharamenyekana uburemere bw'imvune uyu rutahizamu yagize.

Amagaju, kuri ubu, ari ku mwanya wa cyenda ku rutonde rwa shampiyona, aho afite amanota 23 mu mikino 18 amaze gukina.