APR yafashe umwanya wa kabiri nyuma yo kunyagira Mukura ibitego 4-2

APR yafashe umwanya wa kabiri nyuma yo gutsinda Mukura ibitego 4-2 mu mukino w'umunsi wa 13 wa shampiyona wabereye kuri Kigali Pele Stadium kuri uyu wa Gatandatu.

Mukura yabanje ibitego bibiri mu gice cya mbere byatsinzwe n'abanya-Ghana, Abdul Jalilu na Boateng Mensah, ariko ikipe y'ingabo z'u Rwanda iva inyuma, irishyura ndetse ibona n'itsinzi.

Mukura yinjiye mu mukino mbere ya APR, ndetse yihariye n'umupira mu minota ya mbere biza no kuyifasha kubona ibitego bibiri mu minota itandatu.

Abdul Jalilu yafunguye amazamu ku munota wa 17, ku gitego yatsinze n'umutwe nyuma ya koruneri yatewe na Uwumukiza Obed.

Ku munota wa 23, Boateng Mensah yatsindiye Mukura igitego cya kabiri, nyuma y'amakosa yakozwe na Aliou Souane, aho yatanze umupira nabi mu rubuga rw'amahina ufatwa n'uyu rutahizamu ukomoka muri Ghana ahita atsinda igitego cye cya gatanu muri shampiyona.

Dushimimana Olivier yatsindiye APR igitego cya mbere ku munota wa 40, ku ishoti yatereye mu ntambwe nke uvuye ku izamu, maze igice cya mbere kirangira Mukura iri mbere n'ibitego 2-1.

Darko Novic yakoze impinduka mbere y'uko igice cya kabiri gitangira aho yakuyemo Taddeo Lwanga, ashyiramo Ruboneka Jean Bosco.

Abasore ba Darko Novic binjiranye imbaraga mu gice cya kabiri, ndetse ku munota wa 48, Tuyisenge Arsene yishyuriye APR nyuma yo kwinjirana umupira, yahawe na Ruboneka Jean Bosco, mu rubuga rw'amahina, acenga ba myugariro ba Mukura, ahita aroba umunyezamu Ssebwato Nicholas.

Ku munota wa 73, Niyigena Clement yatsinze igitego cya Gatatu ku ruhande rwa APR, nyuma ya 'freekick' yatewe na Mugisha Gilbert mu rukuta rw'abakinnyi ba Mukura, umupira ugarukita uyu myugariro wari uhagaze neza, ahita atera mu izamu.

Nyuma y'iminota itanu, Kwitonda Alain, winjiye mu kibuga asimbuye, yatsinze igitego cya kane cya APR, atereye ishoti kure cyane y'izamu.

APR yahise ifata umwanya wa kabiri ku rutonde rwa shampiyona n'amanota 25 nyuma y'imikino 12 imaze gukina, mu gihe Mukura, itozwa na Lofti, iri ku mwanya wa munani n'amanota 17 nyuma y'iminota 13 imaze gukina.

Photo: Abakinnyi ba APR bishimiye cyane igitego cya kane, cyatsinzwe na Kwitonda Alain Bacca, kubera ubwiza bwacyo.