APR FC yasezerewe mu ijonjora rya mbere rya CAF Champions League, nyuma yo kunyagirwa na Pyramids ibitego 3-0 mu mukino wo kwishyura wabereye kuri 30 June Stadium i Cairo mu Misiri kuri iki Cyumweru, tariki 5 Ukwakira 2025.

Iyi kipe y'Ingabo z'u Rwanda yari yatsindiwe i Kigali ibitego 2-0, byose byatsinzwe na Fiston Mayele, bituma isezererwa ku giteranyo cy'ibitego 5-0.

Kuri uyu mugoroba, umutoza mukuru wa APR, Abderrahim Talib, yari yakoze impinduka muri 11 yabanje mu kibuga ugereranyije n'abo yakoresheje mu mukino ubanza.

Mugisha Gilbert, utarajyanye n'ikipe kubera yari afite ubukwe mu mpera z'iki cyumweru, yasimbujwe na Denis Omedi mu bakinnyi babanje mu kibuga. Ni mu gihe, Hakim Kiwanuka na we yari yabanje mu kibuga.

Talib kandi yari yakuye Dauda Yussif, wari wabanje mu kibuga mu mukino ubanza, na Mamadou Sy mu bakinnyi 20 bifashishijwe kuri uyu mukino kubera imyitwarire mibi.

Mostafa Abdel Raouf niwe watsindiye Pyramids igitego cya mbere ku munota wa 43. Ahmed Atef yatsinze igitego cya kabiri n'umutwe ku munota 60, mu gihe Mohamed Hamdy yatsinze igitego cya gatatu n'umutwe nyuma y'iminota ibiri.

Ni ku nshuro ya gatatu yikurikiranya Pyramids isezereye APR muri CAF Champions League, gusa inshuro ebyiri ziheruka yayisezereraga mu ijonjora rya kabiri.