Amafoto: Niyigena Clement yafashije APR gutsinda AS Kigali nyuma y'imyaka itandatu

APR yatsinze AS Kigali igitego 1-0, ishyira akadomo ku rugendo rw'imyaka itandatu yari imaze itayitsinda muri shampiyona y'icyiciro cya mbere mu Rwanda.

Niyigena Clement ni we wafashije iyi kipe y'ingabo z'u Rwanda kubona amanota atatu mu mukino wabereye kuri Kigali Pele Stadium kuri iki Cyumweru, tariki 1 Ukuboza 2024.

APR yinjiye mu mukino inyotewe no kubona amanota atatu imbere ya AS Kigali byumwihariko muri shampiyona, dore ko yaherukaga kubikora tariki 23 Ukuboza 2018 ubwo yayitsindaga ibitego 3-0.

Gusa APR yaherukaga gutsinda iyi kipe y'Umujyi wa Kigali mu Gikombe cy'Amahoro tariki 17 Mutarama 2024, ubwo Ruboneka Jean Bosco yayifashaga kubona itsinzi y'igitego 1-0.

Ni mu gihe AS Kigali yo yinjiye mu mukino ishaka kugumana ako gahigo, ariko inashaka kugabanya ikinyuranyo kiri hagati yayo na Rayon Sports, iri ku mwanya wa mbere.

Amakipe yombi yakinnye umukino utaryoheye ijisho igice cya mbere, cyarangiye ari 0-0.

Gusa muri iki gice habonetsemo uburyo bwo gutsinda igitego ku mpande zombi, aho APR yagiye ihusha uburyo butandukanye burimo ubwa Mamadou Sy, mu gihe Emmanuel Okwi nawe yahushije uburyo bubiri bwashoboraga kuvamo igitego ku ruhande rwa AS Kigali.

Mu gice cya kabiri, abasore ba Darko Novic bagarutse bari hejuru gato ya AS Kigali byumwihariko mu guhererekanya umupira.

Ku munota wa 57, Okwi yabonye amahirwe yo gufungura amazamu ubwo yahabwaga umupira na Benedata Janvier, maze uyu rutahizamu, ukomoka mu Bugande, awufunga neza ari hagati ya ba myugariro babiri, Niyigena Clement na Aliou Souané, ahita atera mu izamu ari nko muri metero 40, umupira uca hejuru gato.

Nyuma y'iminota mike, Mamadou Sy yarase uburyo bukomeye asigaranye n'umunyezamu wa AS Kigali, Hakizimana Adolphe, nyuma y'umupira yari ahawe na Chidiebere Nwobodo, ariko umupira umubana muremure, ukurwamo n'umunyezamu.

Ku munota wa 62, Niyigena Clement yatsinze igitego cy'umutwe, ku mupira w'umuterekano watewe na Ruboneka nyuma y'ikosa ryari rikorewe Mugisha Gilbert ku ruhande rw'ibumoso.

Icyo gitego ni nacyo cyaje guhesha APR itsinzi, ihita ifata umwanya wa gatanu ku rutonde rwa shampiyona aho yagize amanota 17, irushwa amanota icyenda na Rayon Sports ya mbere.

AS Kigali, itozwa na Mbarushimana Shabani, yagumye ku mwanya wa kabiri n'amanota 20.

Photo: Abakinnyi ba APR bishimira igitego cyatsinzwe na Niyigena Clement ku munota wa 62.

Photo: Mugiraneza Frodouard yongeye kugirirwa icyizere cyo kubanza mu kibuga hagati, nubwo yakinnye igice cya mbere gusa agahita asimburwa.

Photo: Mugiraneza Frodouard ahanganiye umupira na Akayezu Jean Bosco wa AS Kigali.

Photo: Niyibizi Ramadan wa APR ahanganiye umupira na Akayezu Jean Bosco mu mukino ikipe y'Ingabo z'igihugu yatsinzemo AS Kigali igitego 1-0.

Photo: Niyibizi Ramadan yagize ikibazo cy'imvune mu gice cya mbere, yatumye asimburwa na Chidiebere Nwobodo mbere y'uko igice cya kabiri gitangira.

Photo: Chairman wa APR, Brig. Gen Deo Rusanganwa, yitabiriye umukino iyi kipe yatsinzemo AS Kigali igitego 1-0.

Photo: Umugaba Mukuru w'Ingabo z'u Rwanda, Gen. Muganga Mubarakh, yitabiriye umukino iyi kipe yatsinzemo AS Kigali igitego 1-0.