Bizimana Djihad yerekeje Al Ahli yo muri Libya

Al Ahli SC, yo muri shampiyona y'icyiciro cya mbere muri Libya, yasinyishije Bizimana Djihad avuye muri Kryvbas Kryvyi Rih yo muri Ukraine.

Bizimana yasinye amasezerano y'imyaka ibiri muri Al Ahli SC, aho yasanze Manzi Thierry, bakinana mu ikipe y'igihugu y'u Rwanda, muri iyi kipe iherereye mu Mujyi wa Tripoli.

Uyu mukinnyi wo hagati mu kibuga yari amaze imyaka ibiri muri Kryvbas Kryvyi Rih, dore ko yayigezemo muri Nyakanga 2023, ndetse yari umwe mu bakinnyi ngenderwaho muri iyi kipe, yafashije gusoreza ku mwanya wa gatatu muri shampiyona y'umwaka w'imikino ushize.

Yaguzwe na Al Ahli, mu gihe yari asigaje amezi atanu ku masezerano ye muri Kryvbas.

Ibinyujije ku mbuga nkoranyambaga zayo, Kryvbas yashimiye Bizimana, usanzwe ari kapiteni w'ikipe y'igihugu y'u Rwanda 'Amavubi,' mu gihe yari amaranye nayo, ivuga ko azahora ari umunyabigwi wayo.

Al Ahli, iheruka kwegukana shampiyona yo muri Libya mu mwaka w'imikino 2022-23, imaze gutsinda imikino yayo umunani yose ya shampiyona muri uyu mwaka mu itsinda rya kane iherereyemo mu gace k'Uburengerazuba.

Al Ahli ibaye ikipe ya kane Bizimana akiniye kuva yasohoka muri shampiyona y'u Rwanda mu 2018. Bizimana yakiniye Rayon Sports kuva mu 2014 kugeza 2015 mbere yo kwerekeza muri APR, yamazemo imyaka hafi itatu.

Nyuma yaje kwerekeza muri SK Beveren, yo mu cyiciro cya kabiri mu Bubiligi, aho yayimazemo imyaka itatu ahita yerekeza muri Deinze, yavuyemo yerekeza muri Kryvbas.

Photo: Bizimana Djihad yasinye amasezerano y'imyaka ibiri muri Al Ahli SC.