Impuzamashyirahamwe y'Umupira w'Amaguru muri Afurika (CAF) yatangaje amakipe y'ibihugu 17, atarimo u Rwanda, yamaze kubona itike ya CHAN 2024 izabera muri Kenya, Tanzania, na Uganda.

Gusa ikipe y'igihugu y'u Rwanda 'Amavubi' iracyafite amahirwe yo kubona itike y'iri rushanwa ry'Igikombe cy'Afurika cy'abakina imbere mu bihugu byabo, dore ko CAF yahishuye ko hari ibindi bihugu bibiri bizatangazwa nyuma.

Ibyo bihugu bibiri bitaratangazwa ni ibizahabwa itike nk'ibyatsinzwe neza (best loser), nyuma y'uko ikipe y'igihugu ya Tunisia n'iya Libya zanze kwitabira CHAN.

Amavubi ari muri ayo makipe abiri y'ibihugu ahabwa amahirwe yo guhitwamo nyuma yo gusoza imikino y'ijonjora rya nyuma yo gushaka itike akurikira Sudani mu gace ka CECAFA, ndetse anasezereye Sudani y'Epfo.

U Rwanda rwasezereye Sudani y'Epfo kubera igitego cyo hanze nyuma y'uko amakipe yombi anganyije ibitego 4-4 mu mikino ibiri. Amavubi, yatojwe na Jimmy Mulisa, yari yatsinze Sudani y'Epfo ibitego 2-1 mu mukino wo kwishyura wabereye kuri Amahoro Stadium tariki 28 Ukuboza 2024.

CHAN, izaba igiye kuba ku nshuro ya munani, izabera muri Kenya, Tanzania, na Uganda guhera tariki 1 kugeza 28 Gashyantare 2025.

U Rwanda ruheruka kwitabira CHAN mu 2021 ubwo yaberaga muri Cameroon, maze yegukanwa na Morocco.

caf

Photo: Ibihugu 17 byatangajwe na CAF byamaze kubona itike ya CHAN 2024.