AS Kigali yatsinze Police igitego 1-0 mu mukino w'ikirarane w'umunsi wa karindwi wa shampiyona y'icyiciro cya mbere mu Rwanda wabaye ku mugoroba wo kuri iki Cyumweru, tariki 10 Ugushyingo 2024, kuri Kigali Pele Stadium.

Iyi kipe, iri gutozwa na Mbarushimana Shabani nyuma yo gutandukana na Guy Bukasa, yahise ijya imbere ya Police, ifata umwanya wa gatatu n'amanota 17 ku rutonde rwa shampiyona nyuma y'imikino icyenda imaze gukina.

Igitego cya AS Kigali cyatsinzwe na Franklin Onyeabor ku munota wa 65, nyuma y'umupira w'umuterekano (freekick) wari utewe na Ntirushwa Aime.

Police yagerageje kurema uburyo bwo gutsinda igitego muri uyu mukino ariko ntiyabasha kubyaza umusaruro ubwo yabonye burimo aho Iradukunda Simeon yananiwe gutsinda asigaranye n'izamu wenyine nyuma y'uko Ani Elijah ateye ishoti riremereye rikagarugwa n'umunyezamu Cuzuzo Aime Gael wa AS Kigali.

AS Kigali yari ifite amahirwe yo kubona igitego cya kabiri muri uyu mukino ubwo Emmanuel Okwi yazamukanaga umupira akawuha Shabani Hussein, ariko uyu rutahizamu ukomoka mu Burundi ateye ishoti rigarurwa n'umunyezamu Rukundo Onesme wa Police rikubita igiti cy'izamu.

Police yahise imanuka ijya ku mwanya wa kane ku rutonde rwa shampiyona, aho ifite amanota 15 nyuma y'imikino icyenda imaze gukina.

Franklin Onyeabor

Photo: Umunya-Nigeria Franklin Onyeabor yatsindiye AS Kigali igitego mu mukino wayihuje na Police, ihita ifata umwanya wa gatatu.