Muhire Kevin ni we mukinnyi mwiza muri shampiyona – Darko Novic

Umutoza mukuru wa APR, Darko Novic, yavuze ko kapiteni wa Rayon Sports, Muhire Kevin, ari we mukinnyi mwiza muri shampiyona y'u Rwanda.

Novic yabitangaje mu kiganiro n'itangazamakuru cyabaye nyuma y'umukino w'umunsi wa 20 wa shampiyona, APR yanganyijemo na Rayon Sports 0-0 kuri Amahoro Stadium.

Ubwo yavugaga ku mukinnyi wabagoye muri uyu mukino, wongeye kurangira nta kipe yinjije igitego, umutoza wa APR yagize ati "Bafite nimero 11 ntibuka izina, uko biri ni we mukinnyi mwiza muri shampiyona."

Novic yavuze ko kandi Ruboneka Jean Bosco n'umunyezamu Ishimwe Pierre ari bo bakinnyi bitwaye neza ku ruhande rw'ikipe ye, bayifasha kutinjizwa igitego.

Nyuma yo kunganya 0-0, APR yananiwe gufata umwanya wa mbere ku rutonde rwa shampiyona bwa mbere muri uyu mwaka w'imikino, dore ko yagumye ku mwanya wa kabiri n'amanota 41 nyuma y'imikino 20 imaze gukina.

Rayon Sports yakomeje kuyobora urutonde rwa shampiyona, aho ifite amanota 43 nyuma y'imikino 20 imaze gukina. Iyi kipe, itozwa na Robertinho, imaze kunganya imikino ine muri itanu iheruka gukina ya shampiyona.

Ni mu gihe, APR yatsinze imikino itatu muri itanu iheruka gukina muri shampiyona, inganya umwe, itsindwa umwe.

Novic yavuze ko uyu mukino w'abakeba kuri iyi nshuro wari ukomeye cyane kurusha ubanza, nawo warangiye amakipe yombi anganya 0-0, kubera ko ubu yegeranye cyane ku rutonde rwa shampiyona.

Avuga ku mikinishirize y'abakinnyi be, umutoza wa APR yasobanuye ko impamvu amaze iminsi atabanza mu kibuga Seidu Dauda Yussif ari ukubera umusaruro muke yatanze mu minsi ishize.

Yagize ati "Dauda yahawe amahirwe ye. Yabanje mu kibuga inshuro nke mu mikino ibanza, muri iyi minsi nabwo hari inshuro yabanje mu kibuga ariko ntiyatanga umusaruro twamusabaga. Gusa uyu munsi urebye uko yitwaye mu minota yakinnye usanga hari nk'imipira ibiri cyangwa itatu ikomeye yatanze, yashoboraga kuvamo ibitego."

Photo: APR na Rayon Sports zanganyije 0-0 mu mukino w'umunsi wa 20 wa shampiyona waberye kuri Amahoro Stadium.