Kiyovu Sports yahagaritse umutoza mukuru wayo Bipfubusa Joslin, imikino ine adatoza kubera umusaruro mubi, nyuma yuko iyi kipe itsinzwe na Bugesera ibitego 2-1 kuri uyu wa Gatandatu.

Ikipe igiye gusigaranwa na Malick Wade, usanzwe utoza Kiyovu y'abato, nkuko byatangajwe n'iyi kipe mu gitondo cyo kuri uyu wa Mbere.

Kiyovu Sports yari imaze imikino itanu yikurikiranya itsindwa muri shampiyona, dore ko imaze gutsinda umukino umwe gusa muri uyu mwaka w'imikino.

Nyuma yo gutsindwa na Bugesera kuri Kigali Pele Stadium ku wa 26 Ukwakira 2024, Kiyovu Sports yahise ijya ku mwanya wa nyuma ku rutonde rwa shampiyona y'icyiciro cya mbere 'Rwanda Premier League, aho ifite amanota atatu n'umwenda w'ibitego icyenda.

Niyo kipe imaze kwinjizwa ibitego byinshi muri shampiyona, aho imaze kwinjizwa ibitego 14 mu mikino itandatu.

Kiyovu Sports izahura na Rayon Sports mu mukino ukurikira wa shampiyona.