Kylian Mbappe yafunguye konte y’ibitego muri shampiyona ya La Liga, ubwo yafashaga Real Madrid gutsinda Real Betis ibitego 2-0 kuri Santiago Bernabéu mu ijoro ryo ku Cyumweru, tariki 1 Nzeri 2024.

Uyu mufaransa, wari utarabona incundura na rimwe cyangwa ngo atange umupira uvamo igitego (assist) muri La Liga, yatsinze ibitego bibiri muri uyu mukino w’umunsi wa kane muri shampiyona y’umwaka w’imikino 2024-25.

Igitego cya mbere Mbappe yagitsinze ku munota wa 67, ku mupira yari ahawe na Federico Valverde, mu gihe igitego cya kabiri yagitsinze ku munota wa 76 kuri penaliti yabonetse nyuma y’ikosa ryari rikorewe Vinicius Junior mu rubuga rw’amahina.

Mbappe w’imyaka 25 yageze muri Real Madrid mu mpeshyi y’uyu mwaka, nyuma yo gusoza amasezerano yarafitanye na PSG yari amaze imyaka irindwi akinira.

Ku mukino we wa mbere muri iyi kipe y’i Madrid, yatsinze igitego kimwe muri 2-0 Real Madrid yatsinze Atalanta mu mukino wa UEFA Super Cup, bituma Los Blancos yegukana iki gikombe ku nshuro ya gatandatu.

Gusa nyuma yaho, Mbappe ntiyorohewe, dore ko imikino itatu ya mbere ye muri La Liga atari azi uko izamu risa.

Kuri ubu Real Madrid iri ku mwanya wa kabiri muri iyi shampiyona yo muri Spain, aho ifite amanota umunani nyuma y’imikino ine. Iri inyuma ya mukeba wayo Barcelona, itaratsindwa cyangwa ngo inganye umukino, ifite amanota 12.