Nizigiyimana Abdul Karim 'Mackenzie' yahishuye ko azasoreza umupira w'amaguru muri Kiyovu Sports.

Aganira na B&B Kigali, Nizigiyimana yagaragaje ko asigaje umwaka umwe cyangwa ibiri kugira ngo asezere ku mupira w'amaguru nk'umukinnyi wabigize umwuga.

Yagize ati "Uyu mwaka w'imikino urangiye? Ndacyafite ubushobozi, birashoboka ko nakwiyongeza cyangwa nkabihagarika, bizaterwa n'ukuntu nzaba niyumva."

Ibi Nizigiyimana yabitangaje nyuma y'uko Kiyovu Sports itsinze Vision ibitego 3-2 kuri uyu wa Gatandatu, tariki 21 Ukuboza 2024, ihita iva no ku mwanya wa nyuma.

Kuri ubu Kiyovu Sports iri ku mwanya wa 14 ku rutonde rwa shampiyona y'icyiciro cya mbere mu Rwanda, aho ifite amanota 11 mu mikino 14 imaze gukina.

Nizigiyimana avuga ko atifuza gusezera umupira w'amaguru amanuye ikipe muri shampiyona cyiciro cya kabiri.

Ati "Icy'ingenzi ni uko Imana yamfasha nkasoza neza, ntamanuye ikipe mu cyiciro cya kabiri, ibintu ntigeze ndota ko byambaho."

Mu mpera za 2023, uyu myugariro ukina ku ruhande rw'iburyo yari yatangaje ko ari gukina umwaka we wa nyuma, gusa aza kwiyongeza nyuma y'uko Kiyovu idasoje neza shampiyona dore ko avuga ko atifuza kuzarangiza umupira w'amaguru nabi.

Nizigiyimana, wageze muri Kiyovu Sports mu mpeshyi ya 2023, yakiniye amakipe menshi yo mu Rwanda arimo APR, Rayon Sports, Gasogi United, na Kiyovu Sports.

Uyu kandi yaciye mu makipe yo hanze y'u Rwanda nka Vital’o, AS Vita Club, Gor Mahia, n'andi.