Ikipe y'Igihugu ya Morocco yatangiye neza Igikombe cy'Afurika cya 2025, yakiriye, aho yatsinze Comoros ibitego 2-0 mu mukino ufungura iri rushanwa wabaye mu ijoro ryo kuri iki Cyumweru.

Brahim Diaz na Ayoub El Kaabi nibo bafashijje Morocco kubona iyi ntsinzi mu mukino wabereye kuri sitade yitiriwe Prince Moulay Abdellah i Rabat.

Morocco yafunguye amazamu ku munota wa 55 ibifashijwemo na Brahim Diaz, ukinira Real Madrid, nyuma y'umupira yahawe na Noussair Mazraoui wa Manchester United.

El Kaabi yatsindiye Morocco igitego cya kabiri ku munota wa 74, aho uyu rutahizamu wa Olympiacos yateye umupira agaramye bizwi nka "bicycle kick" mu cyongereza, nyuma y'umupira yari ahawe na Salah-Eddine.

Nubwo ari ikipe idahabwa amahirwe cyane mu gikombe cy'Afurika, Comoros yari yagerageje kwihagararaho mu minota ya mbere y'umukino ibifashijwemo n'umunyezamu wayo, Yannick Pandor, wakuyemo penaliti ya Soufiane Rahimi ku munota wa 11.

Morocco, yakiriye Igikombe cy'Afurika kiri gukinwa ku nshuro ya 35, iheruka kwegukana iri rushanwa, riruta ayandi ahuza ibihugu muri Afurika, mu 1976.

Iyi kipe y'igihugu, itozwa na Walid Regragui, izagaruka mu kibuga ku wa Gatanu, tariki 26 Ukuboza 2025, ikina na Mali.

Ni mu gihe Comoros izakurikizaho Zambia kuri uwo munsi.