Mukura Victory Sports yasinyishije rutahizamu w'umunya-Rwanda Mutsinzi Patrick amasezerano y'imyaka ibiri.

Mutsinzi yari aherutse gutandukana na Masfout Club yo muri shampiyona y'icyiciro cya kabiri muri Leta Zunze Ubumwe z'Abarabu.

Uyu mukinnyi w'imyaka 22 kandi yanakiniye Al Wahda yo muri Leta Zunze Ubumwe z'Abarabu, gusa yari yarabanje gukinira Heroes yo mu Rwanda.

Ni umukinnyi wa kane Mukura isinyishije mu igura n'igurisha ryo muri iyi mpeshyi ya 2025, aho akurikiye Tuyishime Emmanuel wavuye mu Amagaju, Joseph Sackey wavuye muri Muhazi United, yamanutse mu cyiciro cya kabiri, ndetse na Pimpong Samuel, wagarutse muri iyi kipe y'i Huye, yakiniraga mbere yo kwerekeza muri Albania KF Shiroka.

Mukura kandi yongera amasezerano Hakizimana Zuber na Niyonzima Eric Fiston, aho bombi basinye amasezerano mashya y'imyaka ibiri.

Iyi kipe, yasoreje ku mwanya wa gatanu muri shampiyona mu mwaka w'imikino ushize, iherutse no gutangaza Nshimiyimana Canisius nk'umutoza mukuru, nyuma y'igihe kinini akora nk'umutoza wungirije, aho yasimbuye umunya-Tunisia Afhamia Lotfi werekeje muri Rayon Sports.

Mukura VS

Photo: Mutsinzi Patrick ni umukinnyi wa kane Mukura isinyishije mu igura n'igurisha ryo muri iyi mpeshyi ya 2025.