Niyonzima 'Seif' Olivier yatsinze ibitego bibiri byafashije Rayon Sports gutsinda Muhazi United ibitego 2-1 mu mukino w'umunsi wa 12 wa shampiyona y'icyiciro cya mbere mu Rwanda wabereye kuri Kigali Pele Stadium kuri uyu wa Gatatu.

Iyi yari itsinzi ya cyenda yikurikiranya Rayon Sports ibonye muri shampiyona, aho itaratsindwa umukino numwe muri uyu mwaka w'imikino nyuma y'imikino 11 imaze gukina.

Abasore ba Robertinho batangiye neza umukino ndetse barushije Muhazi United mu gice cya mbere cyose.

Niyonzima yafunguye amazamu ku munota wa 11 ku gitego yatsinze n'umutwe nyuma ya 'freekick' yatewe na Bugingo Hakim.

Nyuma y'iminota ibiri, Fall Ngagne yatekereje ko atsinze igitego cya kabiri cya Rayon Sports, nyuma yo guhabwa umupira mwiza na Muhire Kevin mu rubuga rw'amahina, maze uyu rutahizamu ukomoka muri Senegal atsindisha agatsitsino ariko umusifuzi wo ku ruhande, Ndayisaba Said, ahita azamura igitambaro, agaragaza ko yari yaraririye.

Ku munota wa 23, Seif yongeye gutsinda igitego cy'umutwe, kiba icya kabiri cya Rayon Sports, nyuma ya koruneri yatewe na Muhire Kevin.

Abakinnyi ba Ruremesha Emmanuel bisubiyeho mu gice cya kabiri, batangira gukina neza kurusha Rayon Sports no gusatira izamu ryayo. Mu gihe, abakinnyi ba Rayon Sports basaga nkaho bananiwe

Kagaba Nicholas yatsindiye Muhazi United igitego ku munota wa 56, nyuma yo kuzamukana umupira wenyine kugeza ageze mu rubuga rw'amahina, atera ishoti riremereye mu izamu, Khadim Ndiaye ntibasha kurigarura. Umukino urangira Rayon Sports icyuye amanota.

Iki gitego cya Muhazi United cyabaye icya mbere Rayon Sports yinjijwe mu mikino icyenda iheruka, dore ko yari imaze imikino icyenda yikurikiranya itsinda kandi itinjizwa igitego muri shampiyona.

Rayon Sports iracyayoboye urutonde rwa shampiyona n'amanota 29, ikaba izigamye ibitego 16. Iyi kipe ukomoka I Nyanza irusha AS Kigali iyikurikira amanota icyenda, ikarusha mukeba wayo, APR, bazahura mu mukino ukurikira kuri uyu wa Gatandatu, amanota 11.

Naho Muhazi United yagumye ku mwanya wa 12 n'amanota 10 mu mikino 12 imaze gukina.

1000048099

Photo: Abafana ba Rayon Sports, bari bitabiriye ku bwinshi, babwiye B&B Kigali ko biteguye gutsinda APR mu mukino utegerejwe mu mpera z'iki cyumweru kuri Amahoro Stadium.