Rayon Sports na APR zanganyije 0-0

Rayon Sports yanganyije na APR 0-0 mu mukino w'ikirarane muri shampiyona y'icyiciro cya mbere mu Rwanda wabereye kuri Amahoro Stadium kuri uyu wa Gatandatu, tariki 7 Ukuboza 2024.

Amakipe yombi yabonye uburyo bwinshi butandukanye bwo gutsinda igitego byumwihariko mu gice cya mbere, ariko habura nimwe ibona inshundura.

Rayon Sports yabonye uburyo bugera kuri bubiri bwo gutsinda igitego mu gice cya mbere burimo ubwa Fall Ngagne, wananiwe gufungura amazamu ku munota wa 17 ubwo yari asigaranye n'umunyezamu wa APR, Pavelh Ndzila, ariko atera umupira ku ruhande gato.

Ku ruhande rwa APR, yabonye uburyo bukomeye bwo gutsinda bugera kuri butatu mu gice cya mbere burimo na 'freekick' yatewe na Niyibizi Ramadan ku munota wa 18, ariko umupira ukubita igiti cy'izamu gihagaze.

Rutahizamu wa APR, Mamadou Sy, nawe yahushije ibitego bibiri byari byabazwe n'abakunzi b'iyi kipe y'ingabo z'igihugu, harimo aho yateye umupira n'umutwe maze ufata inshundura zo ku mpande.

Mu gice cya kabiri amakipe yombi ntiyaremye uburyo bukomeye bwinshi bwo gutsinda, uyu mukino ufatwa nk'ukomeye mu mupira w'amaguru nyarwanda urangiye nta kipe nimwe ibonye inshunduro.

Uyu mukino wabaye uwa mbere ubereye muri Amahoro Stadium ivuguruye, yakira ibihumbi 45 bisaga, ikuzura.

Rayon Sports yagumye ku mwanya wa mbere n'amanota 30 nyuma y'imikino 12 imaze gukina, aho irusha AS Kigali ya kabiri amanota arindwi. Mu gihe, APR iri ku mwanya wa gatanu n'amanota 19, nyuma y'imikino 10 imaze gukina.

Photo: Amakipe yombi yahushije uburyo bukomeye bwo gutsinda, birangira nta nimwe ibonye izamu.

Photo: Hari ishyaka ryinshi mu kibuga hagati ku mpande zombi, byatumaga abakinnyi bakorerana amakosa menshi.