Rayon Sports yatsinze Etincelles igitego 1-0 mu mukino w'ikirarane wa shampiyona y'icyiciro cya mbere mu Rwanda wabereye kuri Kigali Pele Stadium ku mugoroba wo kuri uyu wa Gatandatu.

Fall Ngagne niwe watsinze igitego kimwe rukumbi cyabonetse muri uyu mukino, bituma iyi kipe itozwa na Robertinho ifata umwanya wa mbere ku rutonde rw'agateganyo rwa shampiyona.

Uyu mukino wagombaga kuba mu mpera z'Ukwakira gusa waje gusubikwa kubera Rayon Sports yari iri mu makipe afite abakinnyi benshi mu ikipe y'igihugu 'Amavubi' yari iri mu mikino yo gushaka itike ya CHAN.

Etincelles yagerageje uburyo bwinshi bwo gutsinda mu gice cya mbere ugereranyije na Rayon Sports yari yakiriye umukino, ariko umunyezamu Khadim N'Diaye atabara iyi kipe, ikomoka i Nyanza.

Mu gice cya kabiri, Rayon Sports yihariye umukino byumwihariko ubwo yakoraga impinduka ikinjiza mu kibuga Adama Bagayogo. Byaje no kuyihira, dore ko yahise itsinda igitego ku munota wa 65.

Bagayogo yakiriye umupira mu ntangiriro z'urubuga rw'amahina, yiruka agana imbere mu rubuga rw'amahina ari hagati ya ba myugariro babiri ba Etincelles, maze atanga umupira kuri Fall Ngagne, wari uhagaze neza, ahita atsinda igitego n'ukuguru kw'ibumoso.

Cyari igitego cya gatatu Ngagne atsinze muri shampiyona, aho yahise anganya na Iraguha Hadji mu bamaze gutsindira Rayon Sports ibitego byinshi.

Sumaila Moro yari aziko yishyuriye Etincelles mu minota 10 ya nyuma y'umukino ubwo yatsindiraga iyi kipe y'i Rubavu ariko asanga yari yaraririye.

Nyuma yo gucyura amanota atatu, Rayon Sports yahise yuzuza itsinzi esheshatu zikurikiranya muri shampiyona kandi itinjizwa igitego, aho kuri ubu iri ku mwanya wa mbere n'amanota 20 mu mikino umunani imaze gukina.

Etincelles yo yagumye ku mwanya wa 12 n'amanota umunani mu mikino icyenda imaze gukina.

Nyuma y'umukino, Kapiteni wa Rayon Sports Muhire Kevin yabwiye B&B Kigali ko ibanga ryo kwitwara neza muri iyi minsi barikesha gusenyera umugozi umwe nk'ikipe.

Fall Ngagne celebrating

Photo: Abakinnyi ba Rayon Sports bishimira igitego cyatsinzwe na Fall Ngagne kuri Kigali Pele Stadium.