Perezida wa Gasogi United, Kakooza Nkuliza Charles uzwi nka KNC, yavuze ko Theodor Malipangou Christian agifitanye amasezerano n’iyi kipe, asaba Rayon Sports, ivugwa mu biganiro n’uyu mukinnyi, kutamutakazaho amafaranga yayo.

Mu kiganiro yagiranye na B&B Kigali 89.7fm, KNC yasobanuye iby’isohoka rya Malipangou muri Gasogi United, ahishura ko agifitanye amasezerano n’iyi kipe azarangira tariki 14 Kanama 2025.

Uyu munya-Centrafrique, ukina hagati mu kibuga asatira, bivugwa ko ari mu biganiro na Rayon Sports, dore ko yanamaze gusezera bagenzi be bakinana muri Gasogi mu butumwa yanditse ku rubuga rwa WhatsApp bahuriyemo.

KNC yasobanuye ko Gasogi United yatangiye ibiganiro na Malipangou byo kongera amasezerano ubwo yari agarutse avuye mu igeragezwa i Dubai mu mwaka ushize, kuko ayo yari afite yari kurangira uyu mwaka w’imikino ugeze hagati.

Ati “Malipangou yaragiye ntibyakunda, aragaruka. Agarutse ndamubwira nti: Urabona warusigaje igihe gito kugira ngo amasezerano yawe arangire, reka tukongere umwaka umwe.”

Yakomeje avuga ko bagiranye ibiganiro maze bumvikana ko yongererwa umushahara ukava ku bihumbi 250 Frw, yari asanzwe ahembwa ku kwezi, ugashyirwa kuri miliyoni imwe, ndetse akajya anahabwa agahimbazamusyi angana n’ibihumbi 100 ku mukino.

KNC yahishuye ko muri ibyo biganiro byo kongera amasezerano, Malipangou yasabye ko yagirwa kapiteni wa Gasogi, ariko akamwereka ko byagaragara nabi kubera ko ubwo yagarukaga mu ikipe avuye Dubai, yasanze umutoza yaragize Muderi Akbar kapiteni.

Yavuze ko Malipangou yemerewe miliyoni 10 z’amasezerano mashya, amafaranga agomba guhabwa mbere ya tariki 30 Ukuboza 2024, gusa umushahara n’agahimbazamusyi bumvikanye mu biganiro bikaba byarahise bitangira kubahirizwa ako kanya, aho yatangiye uyu mwaka w’imikino ahembwa miliyoni imwe.

KNC agaragaza ko Malipangou yashutswe n’abantu “bamwereka ko atarasinya kandi amasezerano ye ya mbere yarangiye.”

Yavuze ko yavuganye na Perezida wa Rayon Sports, Twagirayezu Thaddée, akamubwira ko nta biganiro iyi kipe, yambara ubururu n’umweru, yagiranye na Malipangou nkuko biri kuvugwa.

KNC kandi yagaragaje ko Malipangou yitwaye nabi muri iki kibazo, amugira inama yo kwicara agatekereza kuko nibigera mu mategeko uyu mukinnyi ariwe bizagiraho ingaruka.

Ati “Ntabwo ukora ibintu nka biriya by’ubusazi byo kwandika muri ‘group’ ya WhatsApp usezera ku ikipe yakureze.”

Perezida wa Gasogi avuga ko atifuza ko ikibazo cya Malipangou n’umukinnyi cyagezwa mu mategeko, agaragaza ko uyu mukinnyi batabanye nabi dore ko yamaze amezi atatu aba iwe, ndetse anafitanye umubano na se.

Malipangou yageze muri Gasogi United muri Nyakanga 2021. Kuva icyo gihe, yabaye umwe mu bakinnyi iyi kipe igenderaho.

Kuri ubu Gasogi United iri ku mwanya wa gatanu n'amanota 15 ku rutonde rwa shampiyona y'icyiciro cya mbere. Iyi kipe iri kwitegura umukino wa shampiyon ifitanye na Gorilla kuri uyu wa Gatandatu, tariki 30 Ugushyingo 2024.

Malipangou Christian

Photo: Malipangou Christian, umaze imyaka itatu muri Gasogi United, ni umwe mu bakinnyi iyi kipe igenderaho.