Rayon Sports yahagaritse umutoza mukuru, Afhamia Lotfi, ndetse n'umwungiriza we, Azzouz Lotfi.

Ni icyemezo cyafashwe n'ubuyobozi bukuru bw'ikipe nyuma y'umusaruro mubi yatangiranye uyu mwaka w'imikino.

Afhamia Lotfi yari yitabiriye imyitozo ya Rayon Sports yo ku mugoroba wo kuri uyu wa Mbere, gusa ataha atayikoresheje dore ko yari yamaze kumenya ko agiye guhagarikwa n'ikipe.

Uyu munya-Tunisia yatangajwe nk'umutoza mukuru wa Rayon Sports tariki 30 Gicurasi 2025, ubwo umwaka w'imikino wa 2024-25 wari ukirangira, avuye muri Mukura.

Nyuma yo gutandukana n'abakinnyi benshi, mu mpeshyi y'uyu mwaka Rayon Sports yongereye mu ikipe abakinnyi 13 bashya barimo Chadrack Bingi Belo bahise batandakuna rugikubita.

Gusa uyu mutoza ukomoka muri Tunisia ntiyatangiranye umusaruro mwiza, aho abakunzi b'iyi kipe bakunze kunenga imikinire ye.

Mu mikino itanu yatoje Rayon Sports – mu marushanwa yemewe – yabonyemo itsinzi imwe gusa.

Aho harimo imikino ibiri y'ijonjora rya mbere rya CAF Confederation Cup, yose yatsinzwemo na Singida Black Stars, birangira iyi kipe, ikomoka i Nyanza, isezerewe ku giteranyo cy'ibitego 3-1.

Mu mikino itatu ya shampiyona y'u Rwanda Rayon Sports imaze gukina, yatsinze Kiyovu Sports igitego 2-0, itsindwa na Police igitego 1-0, inganya na Gasogi United ibitego 2-2.

Mu itangazo iyi kipe, yambara ubururu n'umweru, yashyize hanze yavuze ko Harouna Ferouz, wari umwe mu batoza bungirije Lotfi, ari we usigarana ikipe mu "gutegura imikino iri mbere."

Ferouz, ukomoka mu Burundi, yageze muri iyi kipe mu mpeshyi y'uyu mwaka, nyuma yo gutoza amakipe y'iwabo arimo Vital'O, Flambeau du Centre, n'andi.

Rayon Sports imaze igihe kinini ihuzagurika mu batoza!

Uyu ni umwaka wa gatatu wikurikiranya, Rayon Sports idasozanya umwaka w'imikino n'umutoza bawutangiranye.

Mu mwaka w'imikino wa 2023-24, iyi kipe, itazirwa Gikundiro, yari yawutangiranye n'umunya-Tunisia Yamen Zelfani, ariko baza gutandukana hashize amezi atatu gusa, ndetse ikipe isoza uwo mwaka w'imikino itojwe n'abatoza batatu batandukanye.

Naho mu mwaka w'imikino wa 2024-25, Rayon Sports yari yatangiranye na Robertinho, gusa iza kumuhagarika habura imikino irindwi gusa kugira ngo shampiyona irangire.

Maze Rwaka Claude, watozaga ikipe y'abagore, ahabwa inshingano zo gutoza imikino yari isigaye irimo n'iy'Igikombe cy'Amahoro, cyaje kwegukanwa na APR itsinze Rayon Sports ibitego 2-0.

Rayon Sports iheruka kwegukana igikombe cya shampiyona y'u Rwanda mu 2019, ubwo yatozwaga na Robertinho. Ni mu gihe iheruka kwegukana Igikombe cy'Amahoro mu 2023, ubwo yatozwaga na Haringingo Francis.

Nsabimana Aimable

Photo: Nsabimana Aimable yatandukanye na Rayon Sports.

Kuri uyu munsi kandi, Rayon Sports yatangaje ko yatandukanye na myugariro Nsabimana Aimable ku bwumvikane bw'impande zombi.

Nsabimana yari amaze imyaka ibiri muri iyi kipe, dore ko yayigezemo mu mpeshyi ya 2023 avuye muri Kiyovu Sports, ndetse mu mpeshyi ya 2024 yongera amasezerano y'imyaka ibiri.

Icyakora mu mwaka w'imikino wa 2024-25, uyu mukinnyi yagiye agirana ibibazo n'ikipe, ndetse bigera n'aho yahagaritse imyitozo kubera kutishyurwa imyenda yari aberewemo n'ikipe, gusa nyuma impande zombi zirumvikana agaruka mu kibuga.

Ubwo umwaka w'imikino waganaga ku musozo, Nsabimana yongeye kugirana ibibazo na Rayon Sports, aho yashinjwaga imyitwarire mibi ndetse binamuviramo guhagarikwa n'ikipe.

Kuva icyo gihe yari atarongera gukinira iyi kipe.