Rayon Sports yakiriye rutahizamu ukomoka muri Guinea-Bissau, Adulai Jaló, wakiniraga Sport Bissau e Benfica, aho yaje mu biganiro bya nyuma n'iyi kipe ubundi akayisinyira.

Jaló w'imyaka 20, wageze ku Kibuga cy'Indege Mpuzamahanga cya Kigali mu rukerera rwo kuri uyu wa Kabiri, yagaragaje ko yishimiye kuza gukina mu Rwanda.

Yavuze ko arajwe inshinga no gutsinda ibitego byinshi ndetse no gufasha Rayon Sports kwegukana ibikombe.

Biteganyijwe ko Jaló asinyira Rayon Sports amasezerano y'imyaka ibiri.

Jaló ni we watsinze ibitego byinshi muri shampiyona y'icyiciro cya mbere muri Guinea-Bissau mu mwaka w'imikino ushize, aho yatsinze ibitego 16, ndetse atanga n'imipira itanu ivamo ibitego.

Azaba abaye umukinnyi wa mbere iyi kipe, yambara ubururu n'umweru, isinyishije mu igura n'igurisha ryo muri Mutarama 2025. Gusa mu minsi ishize Rayon Sports yari yakiriye umunya-Cameroon, Assane Nah Innocent wari uje mu biganiro bya nyuma n'iyi kipe, nubwo kugeza aya magingo atarasinya.

Ni mu gihe Perezida w'Umuryango wa Rayon Sports, Twagirayezu Thaddée, aherutse gutangaza ko kuri ubu iyi kipe, ikomoka i Nyanza, itemerewe kwandikisha abakinnyi itarishyura umutoza Haringingo Francis, wayitoje hagati ya 2021 na 2022, ibereyemo ideni ringana na miliyoni 9 Frw.

Yagize ati "Mu ideni rya miliyoni 400 Frw twasanze, harimo miliyoni 9 Frw z'umutoza. Ubu FIFA yadushyiriyeho agasaraba, ntabwo dushobora kwandikisha abakinnyi tutabanje kumwishyura ariko tugiye kubitunganya."

Rayon Sports yasoje imikino ibanza ya shampiyona iyoboye urutonde n'amanota 36, aho irusha mukeba wayo, APR, amanota atanu.

FB_IMG_17380642457852-629x400

Photo: Adulai Jaló yitwaye neza mu mwaka w'imikino ushize, aho yatsinze ibitego 16 atanga n'imipira itanu ivamo ibitego.