Rayon Sports yatangiye imikino yo kwishyura ya shampiyona inganya na Musanze ibitego 2-2 mu mukino wabereye kuri Kigali Pele Stadium kuri iki Cyumweru, tariki 9 Gashyantare 2025.
Musanze, yari yatsindiwe kuri Stade Ubworoherane na Rayon Sports igitego 1-0 mu mukino ubanza, byayisabye kugenda iva nyuma ikishyura kugira ngo itahane inota rimwe.
Fall Ngagne yongeye kwimurika muri shampiyona y'icyiciro cya mbere mu Rwanda, dore ko ari we watsindiye Rayon Sports ibitego bibiri, gusa ntibyari bihagije ngo biyihe amanota atatu.
Uyu rutahizamu yahise yuzuza ibitego 11, ndetse ni we umaze gutsinda ibitego byinshi muri shampiyona y'icyiciro cya mbere mu Rwanda.
Ni mu gihe ibitego bibiri bya Musanze byatsinzwe na Sunday Inemesit ndetse na Johnson Adeaga Adeshola.
Igice cya mbere cyarangiye amakipe yombi anganya igitego 1-1, nyuma y'uko ibitego byombi bibonetse mu minota y'inyongera y'igice cya mbere. Fall Ngagne yafunguye amazamu ku gitego yatsinze n'umutwe nyuma ya koruneri yari imaze guterwa na Muhire Kevin.
Gusa nyuma y'iminota mike, hakiri gukinwa iminota y'inyongera ku gice cya mbere, Sunday Inemesit ahita yishyurira Musanze kuri 'freekick' yatereye hanze y'urubuga rw'amahina.
Nyuma y'ihangana rikomeye ryagaragaye mu kibuga, byasabye umunota wa 82 kugira ngo Rayon Sports yongere kuyobora umukino, ku gitego cyatsinzwe na Fall Ngagne n'umutwe nanone ku mupira wavuye muri 'freekick' yatewe na Muhire Kevin.
Adeaga Adeshola yishyuriye Musanze ku munota wa 89, ku gitego yatsinze n'umutwe nyuma ya 'freekick' yatewe na Konfor Bertrand.
Rayon Sports yagumye ku mwanya wa mbere ku rutonde rwa shampiyona, aho ifite amanota 37, irusha APR, iyikurikiye, amanota atatu. Izigamye ibitego 19 mu mikino 16 ya shampiyona imaze gukina.
Ni inshuro ya kane iyi kipe, yambara ubururu n'umweru, inganyije muri shampiyona y'uyu mwaka w'imikino.
Musanze yasubiye inyuma ijya ku mwanya wa 11, nyuma yo kunganya, Marines igatsinda, aho ifite amanota 17 n'umwenda w'ibitego bibiri mu mikino 16 imaze gukina.
Nyuma yo gutanga imipira ibiri yavuyemo ibitego bya Rayon Sports, Muhire Kevin yahise yuzuza imipira 10 ivamo ibitego amaze gutanga muri shampiyona y'uyu mwaka w'imikino.
Photo: Fall Ngagne yatsindiye Rayon Sports ibitego bibiri, ahita yuzuza 11 amaze gutsinda muri shampiyona.
Photo: Umunyezamu wa Musanze, Nsabimana Jean de Dieu, aryamye hasi mu mukino warangiye ari ibitego 2-2.
Photo: Kapiteni wa Rayon Sports, Muhire Kevin, amaze gutanga imipira 10 ivamo ibitego muri shampiyona y'uyu mwaka w'imikino.
Photo: Abakinnyi ba Rayon Sports bajya inama mu kibuga mu mukino bagowemo cyane na Musanze.
Photo: Ndayishimiye Richard wa Rayon Sports ahanganiye umupira n'abakinnyi ba Musanze.
Photo: Fall Ngagne yatanze akazi katoroshye ku bakinnyi ba Musanze.
Leave a Comment