Rodri yegukanye Ballon d'Or

Rodrigo Hernández Cascante, uzwi nka Rodri, yegukanye Ballon d'Or ya 2024 ahigitse Vinicius Jr na Jude Bellingham.

Uyu mukinnyi ukomoka muri Esipanye yafashije Manchester City kwegukana Premier League, afasha n'ikipe y'igihugu ya Esipanye kwegukana Euro ya 2024 mu mwaka w'imikino ushize.

Rodri w'imyaka 28 abaye umukinnyi wa mbere ukina muri Premier League wegukanye Ballon d'Or kuva 2008, ubwo yegukanagwa na Cristiano Ronaldo ari muri Manchester United.

Mbere y'itangwa ry'iki gihembo, gitegurwa n'igitangazamakuru France Football, abenshi bari biteze ko kiri bwegukanwe na Vinicius.

Mu mwaka w'imikino wa 2023-24, Vini yafashije Real Madrid kwegukana ibikombe bitatu birimo UEFA Champions League, aho yanatowe nk'umukinnyi mwiza w'umwaka muri iri rushanwa.

Nyuma yuko Rodri ahawe iki gihembo, byakuruye impagarara aho abakunzi b'umupira w'amaguru benshi bifashishije imbuga nkoranyambaga mu kwerekana ko batishimiye icyo cyemezo.

Ndetse n'abakinnyi batandukanye barimo abakinira Real Madrid ndetse n'andi makipe bagiye bagaragaza ko Vini yarakwiye kwegukana Ballon d’Or.

Vini nawe yifashishije urubuga rwe rwa X yagaragaje ko ataciwe intege no kudahabwa Ballon d'Or.

Ati "Nzakora ibirenzeho inshuro 10.....Ntabwo biteguye."

Photo: Abarimo Eduardo Camavinga, ukinana na Vini muri Real Madrid, bagaragaje ko uyu munya-Brazil yarakwiye kwegukana Ballon d'Or.

Mu bagore, umunya-Esipanye Aitana Bonmatí, ukinira Barcelona Femení, yongeye kwegukana Ballon d’Or, dore ko ari nawe wari wegukanye iya 2023.

Mu bindi bihembo byatanzwe, Lamine Yamal yegukanye Kopa Trophy, igihembo gihabwa umukinnyi ukiri muto w'umwaka, Carlo Ancelotti yegukanye Johan Cruyff Trophy, igihembo gihabwa umutoza mwiza w'umwaka, Real Madrid yabaye ikipe nziza y'umwaka, mu gihe Emiliano Martinez yegukanye Yachine Trophy, igihembo gihabwa umunyezamu mwiza w'umwaka.