Seninga Innocent yagizwe umutoza mukuru wa Etincelles

Seninga Innocent yagizwe umutoza mukuru wa Etincelles mu gihe kingana n'amezi atandatu.

Uyu mutoza aje asimbura Nzeyimana Mailo, wasubiye iwabo i Burundi kubera uburwayi, ndetse nyuma akaza gushinjwa n'ubuyobozi bw'ikipe guta akazi.

Seninga si mushya muri Etincelles, dore ko yayiherukagamo mu 2019. Kuri iyi nshuro, yahawe gutoza iyi kipe yo mu karere ka Rubavu kugeza umwaka w'imikino 2024-25 urangiye.

Agarutse gutoza mu Rwanda nyuma y'uko atandukanye na Gendermerie yo muri shampiyona y'icyiciro cya mbere muri Djibouti, yari amaze amezi ane abereye umutoza mukuru.

Bivugwa ko Seninga yatandukanye na Gendermerie kubera ibibazo by'ubukungu iyi kipe yari ifite.

Seninga yatoje amakipe atandukanye muri shampiyona y'icyiciro cya mbere mu Rwanda arimo Sunrise, Musanze, Police, ndetse na Bugesera.

Uyu mugabo, ufite impamyabumenyi mu gutoza yakuye mu Budage, akaba yarabaye umutoza wungirije mu ikipe y'igihugu y'u Rwanda 'Amavubi.'

Seninga asanze Etincelles ku mwanya wa 13 ku rutonde rwa shampiyona, aho ifite amanota 14 nyuma y'imikino ibanza.

Etincelles izatangira imikino yo kwishyura ya shampiyona, yakirwa na Amagaju ku Cyumweru, tariki 9 Gashyantare 2025.

Photo: Seninga Innocent ubwo yatangazwaga nk'umutoza mukuru wa Gendermerie muri Kanama 2024.