U Rwanda rwabuze itike ya CHAN nubwo rwatsinze Sudani y'Epfo

Ikipe y'igihugu y'u Rwanda 'Amavubi' yabuze itike ya CHAN 2024, nubwo yatsinze Sudani y'Epfo ibitego 2-1 mu mukino wo kwishyura w'ijonjora rya nyuma ryo gushaka itike y'iri rushanwa wabereye kuri Amahoro Stadium ku wa 28 Ukuboza 2024.

Ibitego by'u Rwanda byatsinzwe na Tuyisenge Arsene ndetse na Muhire Kevin, gusa ntibyari bihagije kugira ngo Amavubi abone itike, dore ko yagiye gukina uyu mukino abizi ko itsinzi idahagije.

U Rwanda rwarushije Sudani y'Epfo mu kibuga ndetse rwashoboraga gutsinda ibitego byinshi birenze bibiri, ariko ntirwabashije kubyaza umusaruro amahirwe menshi yo gutsinda rwaremye.

Tuyisenge yafunguye amazamu ku munota wa 33, nyuma y'amakosa y'umunyezamu wa Sudani y'Epfo, Juma Amuk, wananiwe kugarura ishoti ryaterewe kure cyane na Tuyisenge rigendera hasi.

Muhire, warase penaliti mu gice cya mbere, yaje gutsindira Amavubi igitego cya kabiri ku munota wa 56.

David Thong-Dhang, winjiye mu kibuga asimbuye, yatsindiye Sudani y'Epfo igitego kimwe rukumbi yaboneye muri uyu mukino ku munota wa 82.

Buri gace muri dutandatu tugize Ishyirahamwe ry'Umupira w'Amaguru muri Afurika (CAF) kazahagararirwa n'amakipe y'ibihugu atatu, uretse CECAFA izahagararirwa n'amakipe ane kubera ko ifite ibihugu bitatu (Kenya, Uganda, na Tanzania) bizakira iri rushanwa, riteganyijwe guhera tariki 1 kugeza 28 Gashyantare 2025.

Bivuze ko Sudani, yatsinze Ethiopia ibitego 4-1 mu mikino ibiri y'ijonjora rya nyuma, Kenya, Uganda, na Tanzania zizahagararira CECAFA muri CHAN igiye kuba ku nshuro ya munani.

Gusa mu gihe CECAFA yaba yongerewe amakipe azayihagararira muri CHAN kubera ko Tunisia na Libya zitazitabira iri rushanwa, u Rwanda rwaba rufite amahirwe yo kwitabira iri rushanwa.

Mu gihe ibyo bitaba, iyi yaba ari inshuro ya mbere u Rwanda rubuze itike ya CHAN inshuro ebyiri zikurikiranya, dore ko ruheruka kwitabira iri rushanwa, ry'abakina imbere mu bihugu byabo, mu ntangiriro za 2021.