U Rwanda rwananiwe kwikura imbere ya Lesotho, banganya 1-1

Ikipe y'igihugu y'u Rwanda 'Amavubi' yanganyije n'iya Lesotho igitego 1-1 mu mukino w'umunsi wa gatandatu wo gushaka itike y'Igikombe cy'Isi cya 2026 wabereye kuri Amahoro Stadium kuri uyu wa Kabiri, tariki 25 Werurwe 2025.

Adel Amrouche yasaga nkugiye kubona itsinzi ye ya mbere nk'umutoza w'Amavubi, gusa igitego Lehlohonoho Fothoane yatsindiye Lesotho ku munota wa 82 cyahinduye ibintu mu Amahoro Stadium, gituma amakipe yombi atahana inota rimwe.

Amavubi yihariye umupira mu gice kinini cy'umukino ndetse arema n'uburyo bwinshi bwo gutsinda kurusha Lesotho ariko ananirwa kububyaza umusaruro ngo atsinde igitego kirenze kimwe.

Lesotho, yari yatsinzwe n'u Rwanda mu mukino igitego 1-0, yasaga niyarushijwe cyane, ndetse ntiyabashije kurema uburyo bukomeye bwo gutsinda mu mukino, ariko inshuro imwe yageze imbere y'izamu, yahise itsinda igitego.

Abasore ba Amrouche baremye uburyo bwinshi bwo gutsinda mu gice cya mbere burimo uburemereye bwaraswe na Mutsinzi Ange, ubwo umupira yateye n'umutwe wacaga hejuru gato y'izamu nyuma ya koruneri yari itewe na Sahabo Hakim.

U Rwanda kandi rwabonye amahirwe akomeye yo gutsinda inshuro ebyiri mu minota 20 ya mbere y'umukino ku mashoti aremereye yatewe na Kwizera Jojea ndetse na Sahabo ariko umunyezamu wa Lesotho, Sekhoane Moerane, arayagarura.

Amavubi yakomeje kwiharira umupira mu gice cya kabiri, ndetse biza no kuyahira atsinda igitego ku munota wa 58.

Kwizera Jojea, wari watsinze Lesotho mu mukino ubanza muri Afurika y'Epfo muri Kamena 2024, niwe watsindiye u Rwanda ku ishoti riremereye yatereye ku murongo winjira mu rubuga rw'amahina nyuma y'umupira muremure yari ahawe na Manzi Thierry, wari kapiteni kuri uyu mugoroba kubera Bizimana Djihad yujuje amakarita y'imihondo.

Lesotho, iri ku mwanya wa 149 ku rutonde ngaruka kwezi rwa FIFA ruheruka, yakomeje kugaragara nk'insina ngufi mu kibuga, gusa umukino wahindutse cyane ku munota wa 82 ubwo Fothoane, winjiye mu kibuga asimbuye, yishyuriraga Lesotho ku ishoti yatereye hafi y'izamu ari hagati ya Mugisha Bonheur na Niyomugabo Claude.

Mugisha Gilbert yabonye amahirwe yo guhesha itsinzi Amavubi ku munota wa 89 ubwo yahabwaga umupira na Kwizera Jojea, ariko ashyizeho umutwe umupira uca ku ruhande gato y'izamu. Umukino urangira amakipe yombi anganyije igitego 1-1.

Photo: Ubwo Mugisha Bonheur yari agiye gutanga umupira mu mukino u Rwanda rwanganyije na Lesotho igitego 1-1.

Amavubi yageze ku mwanya wa kabiri mu Itsinda C aherereyemo mu gushaka itike y'Igikombe cy'Isi, aho afite amanota umunani mu mikino itandatu amaze gukina, arushwa amanota atanu na Afurika y'Epfo, iyoboye itsinda.

Lesotho yagumye ku mwanya wa gatanu, aho ifite amanota atandatu mu mikino itandatu amaze gukina.