Sporting Clube de Portugal yanyagiye Manchester City ibitego 4-1 mu mukino w'umunsi wa kane wa UEFA Champions League wabaye mu ijoro ryo kuri uyu wa Gatatu, tariki 5 Ugushyingo 2024.

Wari umukino wa nyuma k'umutoza wa Sporting CP, Rúben Amorim, atojemo iyi kipe iri mu rugo dore ko azatangira akazi nk'umutoza mukuru wa Manchester United tariki 11 Ugushyingo 2024.

Rutahizamu wa Sporting CP, Viktor Gyökeres, yongeye kwigaragaza aho yatsinze ibitatu muri uyu mukino birimo ibya penaliti bibiri, mu gihe Maximiliano Araujo yatsinze ikindi gitego bifasha iyi kipe yo muri Portugal kubona itsinzi iremereye ku kibuga cyayo.

Phil Foden yari yafunguye amazamu ku ruhande rwa Manchester City, gusa Sporting CP yavuye inyuma irishyura ibona n'itsinzi mu mukino, Erling Haaland yarasemo penaliti.

Yari inshuro ya gatatu ikipe itozwa na Pep Guardiola itsinzwe ibitego bine muri UEFA Champions League, aho byaherukaga kuba mu 2016 ubwo Barcelona yatsindaga Man City ibitego 4-0, mu gihe inshuro ya mbere byabaye mu 2014 ubwo Real Madrid yatsindaga Bayern Munich ibitego 4-0.

Iyi kandi yari itsinzwi ya gatatu ku yikurikiranya kuri Manchester City mu marushanwa yose muri uyu mwaka w'imikino.

Ku rundi ruhande, Real Madrid yatsindiwe ku kibuga cyayo na AC Milan ibitego 3-1.

Ibitego bya Malick Thiaw, Alvaro Morata na Tijjani Reijnders nibyo byafashije AC milan kubonera itsinzi bwa mbere mu mateka yayo hanze y'ikibuga cyayo ihanganye n'uheruka kwegukana iri rushanwa. Ni mu gihe igitego kimwe rukumbi cya Real Madrid cyatrsinzwe na Vinicius Jr kuri penaliti.

Real Madrid 1-3 AC Milan

Photo: Real Madrid yatsindiwe ku kibuga cyayo ibitego 3-1, uba umukino wa kabiri muri ine itsinzwe muri UEFA Champions League y'uyu mwaka.

Liverpool yo yakiraga Xabi Alonso, wagarukaga kuri Anfield, na Leverkusen ibanyagira ibitego 4-0. Luiz Diaz yatsinze ibitego bitatu muri uyu mukino, mu gihe Cody Gakpo yatsinze ikindi gitego.

Imikino y'umunsi wa kane ya UEFA Champions League irakomeza ku mugoroba w'uyu munsi, aho mu mikino itegerejwe cyane harimo urahuza Inter Milan na Arsenal, ndetse n'uwo PSG irakiramo Atlético Madrid.

DAY 4 RESULTS

Photo: Imikino yose y'umunsi wa kane yabaye mu ijoro ryo kuri uyu wa Kabiri.