Real Madrid yatsinze Manchester City ibitego 3-2 mu mukino ubanza wa kamarampaka muri UEFA Champions League wabaye mu ijoro ryo ku wa 11 Gashyantare 2025, iba inshuro ya mbere itsindiye kuri Etihad Stadium i Manchester.

Manchester City yayoboye umukino kugeza ku munota wa 80, mbere y'uko Brahim Diaz, winjiye mu kibuga asimbuye Rodyrgo, na Bellingham bahesha Real Madrid itsinzi iremereye, itera intambwe igana muri 1/8.

Erling Haaland yafunguye amazamu ku munota wa 19 ku mupira yahawe na Joško Gvardiol n'igituza, bituma uyu rutahizamu, ukomoka muri Norway, yuzuza ibitego 48 amaze gutsinda mu mikino 48 ya Champions League amaze gukina, ndetse iba ni inshuro ya mbere atsinze Real Madrid.

Kylian Mbappe yishyuriye Real Madrid ku munota wa 60, mbere y'uko Haaland yongera gushyira Manchester City imbere ku gitego yatsinze kuri penaliti, nyuma y'ikosa ryakorewe Dani Ceballos yakoreye Phil Foden mu rubuga rw'amahina.

Diaz yatsindiye Real Madrid igitego cyo kwishyura ku munota wa 86, nyuma y'iminota ibiri gusa yinjiye mu kibuga.

Bellingham yaje guhesha itsinzi iyi kipe y'i Madrid ku munota wa kabiri wa kabiri w'inyongera kuri 90 y'umukino ku mupira yahawe na Vinicius Jr, wabaye umukinnyi witwaye neza muri uyu mukino.

Ni inshuro ya kane Manchester City itangiye iyobora umukino gusa bikarangira itsinzwe muri Champions League yo muri uyu mwaka w'imikino, dore ko byayibayeho ku mukino wa Feyenoord, Sporting CP, n'uwa Paris Saint-Germain.

Umukino wo kwishyura utegerejwe tariki 19 Gashyantare 2025 kuri Santiago Bernabéu, kugira ngo habonek ikipe ikomeza muri 1/8.

Indi mikino ya kamarampaka yabaye mu ijoro ryakeye:

Brest 0-3 Paris Saint-Germain

Sporting CP 0-3 Dortmund

Juventus 2-1 PSV