Kylian Mbappe yatsinze ibitego bitatu (hat-trick) byafashije Real Madrid gutsinda Manchester City ibitego 3-1 mu mukino wo kwishyura wa kamarampaka muri UEFA Champions League wabereye kuri Santiago Bernabéu mu ijoro ryo kuri uyu wa Gatatu.

Real Madrid yahise isezerera Pep Guardiola n'abasore be ku giteranyo cy'ibitego 6-3 mu mikino yombi, dore ko umukino ubanza iyi kipe y'i Madrid yari yakuye intsinzi y'ibitego 3-2 kuri Etihad Stadium.

Iyi kipe, itozwa na Carlo Ancelotti, izahura hagati ya Atlético Madrid na Bayer Leverkusen muri 1/8.

Mbappe yafunguye amazamu ku munota wa kane, nyuma y'umupira muremure yahawe na Raúl Asencio maze uyu rutahizamu, ukomoka mu Bufaransa, ahita awurenza umunyezamu wa Man City, Ederson, ujya mu izamu.

Uyu mukinnyi w'imyaka 26 yatsinze igitego cya kabiri ku munota wa 32, nyuma yo guhabwa umupira na Rodrygo, acenga Joško Gvardiol, ahita atsinda.

Mbappe yatsinze igitego cya gatatu ku munota wa 60, ku ishoti rigendera hasi yatereye ku murongo w'urubuga rw'amahina.

Man City yabonye igitego kimwe ku munota wa mbere w'inyongera, nyuma ya 'freekick' yatewe na Omar Marmoush, ikubita igiti cy'izamu gitambitse, maze Nico González ahita yongezamo.

Amakipe umunani yakomeje muri 1/8 biciye muri kamarampaka, azatomborana n'andi umunani yabonye itike adaciye muri kamarampaka nyuma yo gusoreza mu myanya umunani ya mbere mu mikino umunani yakinwe mbere.

GkL3QbLWQAACU2Y

Photo: Kylian Mbappe yishimira igitego cya gatatu na Jude Bellingham.

Amakipe umunani yabonye itike ya 1/8 biciye muri kamarampaka:

Real Madrid, PSV Eindhoven, Bayern Munich, PSG, Club Brugge, Dortmund, Benfica, na Feyenoord.

Amakipe umunani yabonye itike ya 1/8 adaciye muri kamarampaka:

Liverpool, Arsenal, Barcelona, Inter Milan, Atlético Madrid, Aston Villa, Lille, na Bayer Leverkusen.