Kapiteni wa APR, Niyomugabo Claude, yavuze ko biteguye gukosora amakosa yose yakozwe mu mikino iheruka mu gihe bitegura gucakirana na Rayon Sports ku wa Gatandatu, tariki 8 Ugushyingo 2025.

Ibi yabibwiye itangazamakuru mbere y'uko aya makipe yombi y'amakeba akina mu mukino w'umunsi wa karindwi wa shampiyona.

Niyomugabo yasabye imbabazi abafana ba APR kubera imyitwarire mibi yaranze ikipe mu ntangiriro z'umwaka w'imikino, avuga ko bagiye kubikosora, bakabona intsinzi imbere ya Rayon Sports.

APR n'umutoza wayo Abderrahim Talib ntibagize intangiriro nziza z'umwaka w'imikino wa 2025-26, dore ko iyi kipe yahise isezererwa rugikubita mu ijonjora rya mbere rya CAF Champions League, ndetse ibura n'igikombe cya CECAFA aho yatahanye umwanya wa gatatu.

Iyi kipe y'Ingabo z'u Rwanda iheruka kunganya imikino ibiri yikurikiranya muri shampiyona, harimo uwo yanganyije na Kiyovu Sports 0-0 ndetse n'uwo yanganyije na Rutsiro igitego 1-1.

Ubu iri ku mwanya wa munani ku rutonde rwa shampiyona, aho ifite amanota umunani mu mikino ine imaze gukina.

Ni mu gihe, Rayon Sports yo bagiye guhura iri ku mwanya wa kabiri n'amanota 13 mu mikino itandatu imaze gukina, aho irushwa amanota atatu na Police ya mbere.