Volleyball: Amakipe ya Police yatsinze aya APR

Amakipe ya Police ya volleyball mu bagore no mu bagabo yatsinze aya APR VC mu mikino y’umunsi wa kabiri wa shampiyona ya volleyball mu Rwanda kuri uyu wa Gatanu, tariki 25 Ukwakira 2024.

Mu bagabo, Police VC yatsinze APR VC amaseti 3-0 mu mukino wabereye kuri Petit Stade. Abasore ba Musoni Fred begukanye seti ya mbere, batsinze amanota 25-21, iya kabiri bayitsinda ku manota 25-17, naho iya gatatu bayitsinda ku manota 25-22.

Ni mu gihe, Police y’abagore yatsinze APR bigoranye amaseti 3-2 mu mukino wari uryoheye ijisho nawo wabereye kuri Petit Stade.

APR WVC yatangiye neza, yegukana seti ya mbere ku manota 25-18, gusa iya kabiri yegukanwe na Police WVC ku manota 25-22.

Abakobwa batozwa na Kamasa Peter bongeye kuyobora umukino, nyuma yo kwegukana seti ya gatatu batsinze amanota 30-28.

Police WVC yegukanye seti ya kane, itsinze APR WVC amanota 25-20 bituma hitabazwa iseti ya kamarampaka , yegukanwe n’ikipe ya Polisi y’u Rwanda ku manota 15-11.

Photo: Police WVC yatsinze APR WVC amaseti 3-2.

Photo: APR VC yatsinzwe na Police VC amaseti 3-0.